المسحراتي- فؤاد حداد 21

كتبت القصائد من صاحب ندا إلى مع السلامه فى رمضان 1388
نوفمبر 1968
الحاج زين
ِ
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى أروح واجى
مـنـقـراتى وبوسطجى
جايب رساله من الحاج زين
على المحطه شايل دورين
شايل معاه السنبلاوين
نورت يا بلدينا المدينه
سافرت صايم منين لفين
يدّك فى ايدى زرنا الحسين
الله يزينك يا حاج زين
على جبينك السجدتين
أما الحبايب باسوا الإيدين
نورت يا بلدينا المدينه
أنا جيت أسحّر والحاج زين
ضحك بسنه وغمز بعين
وقال لى صبرك يا أبو جناحين
ننزل نسحّر الاتنين سوا
أنا قلت يللا قال لى هوا
نورت يا بلدينا المدينه
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
ليالى مبروكه بتنقّط علينا الضىّ
يجرى عليها الزمان اللى بيطوى طىّ
قلبى انعصر لما قال يا شهر عن إذنك
لا أوحش الله منك أهل هذا الحىّ
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق
 
 
 

مشاركة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
باب مصر