"مرت " .. قصيدة للشاعر محمود الشوربجى

مَرت
و سابت قلبي متعلق فـ شباكها
كـ نور بيعدي من ضل السحاب بشويش
يزغزغ عيني ما تدمع
و أدمع لما متعديش .. !
..
مَرت ..
صلبت القلب وياها
و صابني فراقها فـ اتهديت
سحبت رصيد دموع العمر
و بِكيت مـ الحنين فـ بَكيت
دروب من مسكرات و ذنوب
حدود أبعد من العاده
بتبقي واقفه بين إيدي
لكن مقدرش اقول حاجه
انا الٱروجوز – انا اللي يجوز
لازلت بشوفها فـ اتمادى .. !
..
عمر خيرت فـ نص الليل
بيعزف بين لُقي و فراق
و انا اللي بصبر المساكين
برغم إني بشوفها أشتاق
شربت الكيف ما كفاني
شربت الزيف ما كفاني
زهدت الدنيا من دونها
و لسه بدونها وحشاني ..!
بتدوش صُبحها فـ قهوه
فـ سابت طعمها فـ حلقي
و قطفت ورده من إيدها
فـ قطفت مـ الضلوع قلبي
و سابت فيا لون فاتح
و انا خَمري
..
فـ عز الليل تشوفني سبيل
و تسرج منی نور باهت
و أشوفها الليل و لو تاهت
بتحضني .. !
بقالنا كتير – مبنعديش
و فاتت مره من جمبي
فـ زال مني الوجع بشويش
و فوقت لقتني مش فايق
اكني كنت بتسابق فـ تسبقني
و لو مره فـ يوم خطيت
بدون ما بحس تلحقني
و يوم ما أختارنا نتفارق
أخدني م النصيب طيفها
مشيت وياها دون شكوى – و لا تأنيب
و أشوفها فـ العيون دمعي
و أشوفها تسيبني دون ما بسيب
و أغيب و تغيب ..
و أغيب و تغيب ..
..
مَرت ..
و سابت قلبي متعلق فـ شباكها
كـ نور بيعدي من ضل السحاب بشويش
تزغزغ عيني فـ تدمع
و أدمع لما متعديش .. !
 
محمود الشوربجي طالب بالفرقة الثالثة بـ كلية الآداب قسم الإعلام، جامعة المنصورة، حاصل على المركز الأول على مستوي كلية الآداب، والمركز الثاني على جامعة المنصورة، في أسبوع فتيان الجامعات بـ جامعة المنصورة.
 
 
 
 
 

مشاركة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى