المسحراتي6| أشعار فؤاد حداد.. كوبري إمبابة

كتب – فؤاد حداد
تصوير – سمر شومان
المسحراتي
6- كوبري إمبابة
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى وجيت فى نسمه طريه
مـنـقـراتى أنادى ع الخضريه
ما فاضلش غير ساعتين على الفجريه
مايل جناحك فى العسل بتسوق
عربيه شايله الخير ونازله السوق
سنتك مباركه وشهرنا مرزوق
والدنيا فرحانه بقمرها الباسم
درج الحديد فى الميه والضى راسم
على كوبرى إمبابه مواسم مواسم
أنا شلت فوق العين وفوق الراس
والظهر شايل الإشوله والاقفاص
رزق الحبايب يتقسم انصاص
رزق الحبايب بالهنا لم يفاصل
من السما بالخير على الأرض واصل
يطعن صغار الطير ويسقى الحواصل
الحمد لله اللطيف الرحيم
وعينى مليانه وقلبى سليم
والناس كريمه وشهر طيب كريم
أضحك لكم ضحك الأمل والتهانى
واعمل أنا الخضرى وانا الفكهانى
ومســحـراتى فى الهوا دكانى
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
عملت أنا فكهانى فى البلد نشوان
أنده على العجميه وحلو من حلوان
على الجوافة روايح والعنب ألوان
البرتقان النسيم اليوسف المشمش
لقيت حديد الكبارى من الحنان يرمش
ويطير بسور الجنينه حسى والكروان
وسبحت فى الندى إمبابه والأكوان
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق
المسحراتي5| أشعار فؤاد حداد.. يوم العمل يوم عيد
المسحراتي 4| أشعار فؤاد حداد.. تونس الخضرا
المسحراتي3| أشعار فؤاد حداد.. تعرفني من صوتي

المسحراتي2| أشعار فؤاد حداد.. الحق واجب

المسحراتي 1| أشعار فؤاد حداد.. تاج المدينة أبوزيد هلال