المسحراتي5| أشعار فؤاد حداد.. يوم العمل يوم عيد

كتب – فؤاد حداد
تصوير: سمر شومان
المسحراتي
5- يوم العمل يوم عيد
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى من هنا لبعيد
مـنـقـراتى من قنا لرشيد
يا كل سطح طلعته بالأناشيد
وكل بيت قايم على العواميد
ودارى بحرى ودارى جوه الصعيد
اللى بناك واللى ضرب طوبك
واللى هداك السعد عمى السعيد
قول يا ديوك ادنوا
ويا أمهات هننوا
ويا بنايين غنوا
يوم العمل يوم عيد
كان يوزن القالب براحة إيد
ع المسطره بالسنتى يا ابو السيد
ويتم ألف ولو قالوا له يعيد
ظهره انحنى ساعتين بلا تنهيد
للمغربيه وهو صايم أكيد
قول يا ديوك ادنوا
ويا أمهات هننوا
ويا بنايين غنوا
يوم العمل يوم عيد
للمغربيه وهو صايم أكيد
يضوى العرق فى جبينه زى الشهيد
نور الايمان يا أمة التوحيد
نور السما فوق راسه بالزغاريد
ينهض ويتشطف شبابه جديد
قول يا ديوك ادنوا
ويا أمهات هننوا
ويا بنايين غنوا
يوم العمل يوم عيد
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
ما احلى العرق لما يضوى من جبين لجبين
من الغيطان والمصانع يفتح الميادين
والديك بيدن ورافع راسه ع الإنتاج
ما أحلى البنا بالغنا ما احلى العمل بمزاج
وضحكة المصرى ترفع للسما أبراج
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق
المسحراتي 4| أشعار فؤاد حداد.. تونس الخضرا
المسحراتي3| أشعار فؤاد حداد.. تعرفني من صوتي

المسحراتي2| أشعار فؤاد حداد.. الحق واجب

المسحراتي 1| أشعار فؤاد حداد.. تاج المدينة أبوزيد هلال

مشاركة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
باب مصر