المسحراتي فؤاد حداد: فُرجت وتُفرَج

فرجت وتفرج

اصحى يا نايم

وحّد الدايم

وقول نويت

بكرة إن حييت

الشهر صايم

والفجر قايم

اصحى يا نايم

وحّد الرزاق

رمضان كريم

مســحـراتي

مـنـقـراتي

لابد أنهج

دي كل ليلة

ابهى وأبهج

والفن منهج

والطبل شيلة

ميلني ميلة

كأنّي أعرج

باحاذى الارصف

واغني واصرف

فرجت وتفرج

فرجت وتفرج

أستاذ مدارسي

من غير لا كرسي

ولا مُدرّج

والواد في إيدي

صبح معيدي

يا دوب تخرّج

فرجت وتفرج

بنقول في مغنى

أفراحه معنى

وأحزانه بهرج

ونقول فتيله

مهما قتيله

لها يوم تصهرج

فرجت وتفرج

العسر يسرا

الليل بيُسرَى

والخيل بيُسرَج

وانا كلي حكمة

لازم أمهرج

والعب بنجمه

وقمر أدحرج

ياحبايبي أهي جت

على نقرة فرجت

ونقرة تفرج

والمشي طاب لي

والدق على طبلي

ناس كانوا قبلي

قالوا في الأمثال:

“الرجل تدب مطرح ماتحب”

وانا صنعتي مســحـراتي في البلد جوال

حبيت ودبيت كما العاشق ليالي طوال

وكل شبر وحتة من بلدي

حتة من كبدي

حتة من موال:

نده عليكي كأن الدنيا نادهالك

قولة ياليلي ليالي العمر قادهالك

يا عيني بالمواويل الحمر قادهالك

غني الأمل والشهامة والفرح والنصر

ولولاكي يا مصر كان قلبه رقد هالك

فؤاد حداد- 1964، من ديوان المسحراتي- الهيئة العامة للكتاب 2011

مشاركة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
باب مصر