المسحراتي فؤاد حداد: عرب مصاروه

عرب مصاروه

 

اصحى يا نايم

وحّد الدايم

وقول نويت

بكرة إن حييت

الشهر صايم

والفجر قايم

اصحى يا نايم

وحّد الرزاق

رمضان كريم

مســحـراتي

مـنـقـراتي

نازل الليله دي

بمزاج فرايحي

قالت مراوحي

يا قلب إهدا

أنا قلت إيه دا

خليه هليهلي

مزاحي يجلي

إحجل يا حجلي

أنا مش طاووس

حاطير برجلي

يا دوب أدوس

أرضى تبارك لي

عاوز أبوس

على ترابها

مناخ عربها

حتى سرابها

يشفي النفوس

هِيَّ اللي هِيّ

الإنسانية

أم الليالي

أم الشموس

سرقت خيالي

وطبلي صهلل

وقلبي شخلل

زي الفلوس

وزاد جناني

وفاض حناني

وكسر سناني

العرقسوس

لفي يا ساقية

دور يا قدوس

إحنا بصراحة

عرب فلاحة

فينا السماحة

عرب مصاروة

في مصر أرحم

بلد وثورة

فينا اللي شحّم

زي اللي جيّر

كبير صغيّر

شايلين فانوس

ومن صعيدي

لبورسعيدي

إيدك وإيدي

على الغموس

والمشي طاب لي

والدق على طبلي

ناس كانوا قبلي

قالوا فى الأمثال

“الرجل تدب مطرح ماتحب”

فؤاد حداد- 1964، من ديوان المسحراتي- الهيئة العامة للكتاب

مشاركة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
باب مصر