المسحراتي فؤاد حداد: بيوت كتيرة

بيوت كتيرة

اصحى يا نايم

وحّد الدايم

وقول نويت

بكرة إن حييت

الشهر صايم

والفجر قايم

اصحى يا نايم

وحّد الرزاق

رمضان كريم

مســحـراتي

مـنـقـراتي

طلبت مراتي

مهر الأميرة

وأنا بحر فني

شال ميت جزيرة

أنا المغني

لبيوت كتيرة

مش اللي قسطُه

قطم له وسطه

ولا اللي مطلي

بمزاج عواطلي

من بره رايق

مليان حرايق

أصل القراية

مش في المراية

لكن في صفحة

أبيض على أسود

دى حكمة واضحة

خلّينى أحْوِد

على بيت في حارة

لولي في محارة

وبيت في عطفة

لولي في صدفة

وبيت في قوقع

خايف ليوقع

وبيت بساقية

ع العهد باقية

وبيت عتبته

عنوان كتابته

وبيت في زقة

بعيش ودَقّة

وبيت خَزينُه

لخبازينُه

وبيت يولَّد

الجاي بعده

ولا حد خلّدْ

ولا حد وحده

على المداخل

بعد المداخن

بيوت مداين

ابني يا وعده

بيوت بُناتها

عرسان بَناتها

أنا بيناتها

المشي طاب لي

والدق على طبلي

ناس كانوا قبلي

قالوا في الأمثال

“الرجل تدب مطرح ماتحب”

وانا صنعتي مســحـراتي في البلد جوال

حبيت ودبيت كما العاشق ليالي طوال

وكل شبر وحتة من بلدي

حتة من كبدي

حتة من موال

المشي طاب لي على طبلي وناياتي

تشب فيها العيدان تجري قناياتي

تسقي وانا سقّا

عمره ما قال لأّه

تحت القمر شقَة

قالت الشوارع باتابع دَقَّةً دَقَّة

ودقَّةً دقَّة تتمايل بناياتي

اصـحى يانايم وحّد الدايم
السعي للصوم خيرٌ من النوم
دي ليالي سمحة نجومها سبحة
اصـحى يانايم يانايم اصحى   وحّد الرزاق

 

فؤاد حداد- 1964، من ديوان المسحراتي- الهيئة العامة للكتاب 2011

 

مشاركة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
باب مصر