المسحراتي فؤاد حداد: افتح يا سمسم
افتح يا سمسم
اصحى يا نايم
وحد الدايم
وقول نويت
بكرة إن حييت
الشهر صايم
والفجر قايم
اصحى يا نايم
وحد الرزاق
رمضان كريم
مسحراتي
منقراتي
ومن سنين
يا مسلمين
على كل عتبة
بافوت اسحر
والليل برقبة
وعمة وعدبة
في الحسن عجبة
عمال يفقر
وانا بانقر
لا علمب غلبة
ولا فني مظهر
ولا دي طلبة
في أولى أزهر
وتانية جيزة
فترة وجيزة
يطلع مهندس
والبنت نرجس
بدل ما تكنس
حتبقى قاضية
جيوبي فاضية
ونفسي راضية
يهديكي طبعي
يا دنيا طاوعي
ويا سكة طاولي
والمشي طاب لي
والدق على طبلي
ناس كانوا قبلي قالوا في الامثال
“الرجل تدب مطرح ما تحب”
وانا صنعتي مسحراتي في البلد جوال
حبيت ودبيت كما عاشق ليالي طوال
وكل شبر وحتة من بلدي
حته من كبدي.. حتة من موال
يا حضرة الباشا فاكر ياما سحرتك
ودمعي تحت القمر بالليل مسح حارتك
وقلت لك خلي قطفة لك وقطفة لي
وربنا يخلي أطفالك وأطفالي
ولا كنت بتصلي يا باشا ولا بتصوم
غير كل حبة على السبحة تقول مخصوم
وكنت يا باشا ما بتسمعش بالعربي
حضروا أطبا يردوا السمع والطاعة
حضروا أطبا يداووا نفس طماعة
افتح يا سمسم جماعة
حضروا بسماعة تكشف قلب سحارتك
اصحى يا نايم وحد الدايم
السعي للصوم خير من النوم
دي ليالي سمحة نجومها سبحة
اصحى يا نايم يا نايم اصحى
وحد الرزاق
فؤاد حداد- 1964
من ديوان المسحراتي- الهيئة العامة للكتاب 2011
