المسحراتي31| أشعار فؤاد حداد.. عم صالح

كتب – فؤاد حداد
تصوير – سمر شومان
عم صالح

اصحى يا نايم

وحّد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحّد الرزاق

رمضان كريم





مســحـراتى
يامصطبه
مـنـقـراتى
دبَى دبَى
على طريقه
مؤدبه
فُرْنك حريقه
ياعم صالح
قايد قوالح
مشرشبه
فيه حد أشطر
من غيطنا الاخضر
قال جاى أكتر
يامرحبا
شوف واد بيجرى
وواد فى حجرى
وواد حبا
شوف الجاموسه
زى العروسه
المعجبه
لها كتف مايل
من الحمايل
والطبطبه
أنا عم صالح
فلاح وفالح
والريح صبا
والخير حيورد
والخطوة تفرد
وتملا مترد
ومحلبه
وتبقى مالك
فى الريف زمالك
والسلك سالك
فى الكهربا   والمشى طاب لى


         والدق على طبلى

ناس كانوا قبلى

          قالوا فى الأمثال:

“الرجل تدب مطرح ماتحب”





* * *



وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى

                   حته من كبدى

                                حته من موال:


العم صالح يقول خد كلمتى هديه
ودقها فى العقول على طبلتك ديه
أنا اللى موالى وهوى لى وطرح زهرى
وست الاف من سنين المحسنين ظهرى
ونيل كبير نهرى وشطوطى منديه
أنا الأمل سُنّتى ورمضان كريم شهرى
يامســحـراتى وادينا مســحـراتيه


اصـحى يانايم


وحّد الدايم