المسحراتي فؤاد حداد: يا عنتر
عنتر
اصحى يا نايم
وحد الدايم
وقول نويت
بكرة إن حييت
الشهر صايم
والفجر قايم
وحد الرزاق
رمضان كريم
مسحراتي
منقراتي
بين الحارات
بافوت أسحر
واقول واعبر
زحنا اللي زاحنا
ولفوق قزحنا
شوف قوس قزحنا
في الجو قنطر
تعا شوف يا عنتر
عنتر وعبلة
عامل وعاملة
أما المزاملة
تهديهم أكتر
تشد قوسهم
وتزيده أسهم
ترفع رؤوسهم
الله أكبر
أما الشهاده
جت تاتا تاتا
بتتهادى
وتتغندر
أما نوبتها
خدت نوبتها
بيبنوا بيتها
على الشمندر
شكر فعالي
أبا ودعالي
بسد عالي
الخير يفجر
ويشق صحرا
على يد سحره
تلبس مشجر
والميه تجري
و تخف رجلي
من الوجع ده
أنا ما لي قعده
المشى طاب لي
والدق على طبلي
ناس كانوا قبلي
قالوا في الأمثال
“الرجل تدب مطرح ما تحب”
وأنا صنعتي مسحراتي في البلد جوال
حبيت ودبيت كما عاشق ليالي طوال
وكل شبر من بلدي
حته من كبدي
حته من موال
عنتر ملك في القوافي وغزلها
صرع السباع الفيافي ورق لغزالها
عشق حورية اسمها الحرية وغزالها
ذبيان وطى وضرب في الحي بالحدين
السلم كان حلم ما اتلمت عليه يدين
إن عاد لعبلة قطف قبلة من الخدين
وجمع في توبها خيوط الشمس وغزلها
اصحى يا نايم وحد الدايم
السعي للصوم خير من النوم
دي ليالي سمحة نجومها سبحة
اصحى يا نايم يا نايم اصحى
وحد الرزاق
فؤاد حداد- 1964، من ديوان المسحراتي- الهيئة العامة للكتاب 2011
