المسحراتي9| أشعار فؤاد حداد.. وردة ما بتدبلش

كتب – فؤاد حداد
تصوير – سمر شومان

المسحراتي9
9- وردة ما بتدبلش
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى فى ندى رمضان
مـنـقـراتى ماشى بين الغيطان
والا فى حوارى الحى ألقى الحيطان
تقول لى شوف الطوب وشوف الحجر
بالليل بيعطش زيه زى الشجر
وكل شىء فى الدنيا رق وشعر
فيه قلب دايما قلب حتى الجماد
وشمس دايما جمر بين الرماد
وفيه منابر سبحت للعرش
يا مؤمنين فيه ورده ما بتدبلش
فيه يد طاهره تحطم الأوثان
عرق النبى بيزهر الاغصان
فيه كلمه يورثها الحفيد عن زبوه
وحرف يتمنوا البشر يكتبوه
على مآقى العين لو انه قديم
عرابى ومحمد عبيد والنديم
فيه ناس بنوا لى بعد ناس بعد ناس
ما بطلوش الرقه والإحساس
وفيه أمل دايما ودايما طريق
أمشيه بخبرة ألف شاعر بريء
فيه حلم أحلم بيه وأصحى وابات
كل الحجاره أفتكرها نبات
فيه ندر دايم للندى والنور
وشهر أبيض فى الزمان مشهور
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
أنا كنت قايم أغنى والا ماشى أدور
ودى صنعتى والا فنى والا باوفى ندور
خد كلمه الحق عنى والأمل مبدور
أنا شفت كل الشوارع تلتفت للضى
وشفت كل الليالى مبحره للنور
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق
المسحراتي8| أشعار فؤاد حداد.. السيد البدوي
المسحراتي7| أشعار فؤاد حداد.. صورة تعدل صورة
المسحراتي6| أشعار فؤاد حداد.. كوبري إمبابة
المسحراتي5| أشعار فؤاد حداد.. يوم العمل يوم عيد
المسحراتي 4| أشعار فؤاد حداد.. تونس الخضرا
المسحراتي3| أشعار فؤاد حداد.. تعرفني من صوتي

المسحراتي2| أشعار فؤاد حداد.. الحق واجب

المسحراتي 1| أشعار فؤاد حداد.. تاج المدينة أبوزيد هلال

مشاركة

‫4 تعليقات

  1. تنبيه: ufabtb
  2. تنبيه: dmt-g

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
باب مصر