قصيدتان من ديوان "الأسامى " لـ محمد حسنى إبراهيم
خيرية السيد شحاتة
وحلفت بالسر الإلَهي أطلعك
من بين ضلوعي لكل حي يحبنى
ويسمي بسم الله
عديت وقُلت استعيذ بإيديك من الأحزان
ميلت ليكي طبطبى واتهجى طعم طفولتى فيك
غنيلى من اغانيك
حموده نام ننه
وبكرة تتهنى
العتبة لو خطيت
بالفرحة تتحنى
وكام قرش اتخرم واتشال على صدري وخُفتى اتحسد ف ايديك
ميلت ليكى طبطبى واتهجى طعم طفولتى فيك
سكة حنان تتفرش وتلم تحتيها
حواديت مع دعوات
ويوم زفافك تقول هاتولى ست البنات
متشوفش يوم خنقة وسماك تكون بالقمر ومطرزة نجمات
ياكنزي ياحيلة
يامكتر العيلة عمري اللى جاى يرضيك
ميلت ليكى طبطبى واتهجى طعم طفولتى فيك
كانت شوارع فيها شوق
والقلب بالحب أرتوى معشوق
لكن ف عشقك يوقف كل دقاته ويحس طعم الفرحة لما يفوق
ياململمة سطوري
ومعلمة ف نوري
عمري ياريت يرضيك
ميلت ليكى طبطى واتهجى طعم طفولتى فيك
مهدى صلاح
تاخد ف وشك حلمها وتهج
وتسلم المفاتيح لروحك ضحكتك
وخطاوي سارحة ع البيبان تشتاق محبة لكل دار
انت العنيد !!!
وانت الفرح وانت النهار
ان غبت عن روح الحبيبة تروح لها
وتسيب عيونك ف الضلوع
نور الليالى والشموع يشتاق يقولك كلمتين
هتروح لفين لو تقطفك من بين عنيها ف زحمة المشوار
وانت الفرح
انت النهار
عايش بصوتها وغصنها ضلل عليك
آيالة ياعمر استويت
من غربة ضايعة ف كل بيت
خبط بروحك بوح بسرك للفضا
أو خلى بالك من خُطاك
إياك تسيبها تروح بعيد وسط انهيار الاسئلة فوق الدماغ
خليك شايفها ف ضحكتك
وف خطوتك سكة عمار
مانت الفرح
وانت النهار
الشاعر محمد حسنى إبراهيم، من أبرز شعراء العامية فى مصر، صدر له العديد من الدواوين الشعرية ومنها “مواسم للعطش والجوع” عن سلسلة أصوات أدبية 1995، “أول خطاوي العشق موت” طبعة خاصة 1997، “عرايس النيل” عن سلسلة النشر الإقليمي 2000، “المكان جواك محاصر” عن دار اكتب 2008، “أنا الشرير بتاع الورد” دار أرابيسك 2009، “السما بتمطر أرواح” 2010 دار ايزيس، “طوابير فرح” جامعة الفيوم 2011، “تكتب جناحين وتطير بيهم” دار الادهم 2012، “آخر مابينا ضحكتك” دار النسيم 2013، ” رباعيات” إصدار خاص منتدى بداية2014، “الأسامى” عن دار الأدهم 2015.
