إسكندرية ماريا وترابها زعفران.. خمسة سياحة في بلد الجدعان

إسكندرية ليه؟ وإسكندرية من غير ليه، مينفعش أقولك ليه لازم تروح اسكندرية، عشان في أي وقت وأي مناسبة هي المكان المناسب لأجازتك.
كما يقولون إن إسكندرية حر في الصيف.. لكن البحر بيخليك تنسى الحر، في الشتا الجو  بيكون متقلب بين معتدل في أول الشتا، وبيكون شديد البرودة في نص الشتا، واعمل حساب المطر في الفصل دا.

إسكندرية
هاتروح إسكندرية ازاي؟

المسافة بين القاهرة والإسكندرية تقريبا ما بين 2.5  لـ4 ساعات، هاتلاقي فيه أكتر من مواصلة أسهلهم القطر، وأسرعهم العربية، وفيه سوبر جيت وطيران لو حابب.
مواعيد القطارات المكيفة و أسعارها بين القاهرة- الإسكندرية

رقم القطار نوع
القطار
من إلى وقت القيام وقت الوصول الدرجة السعر
903 اكسبريس
مكيف أسباني
القاهرة الإسكندرية 06:00ص 09:15ص أولى مكيف
ثانية مكيف
52.04ج
30.25ج
901 اكسبريس
مكيف أسباني
القاهرة الإسكندرية 08:15ص 11:00ص أولى مكيف
ثانية مكيف
52.4ج
30.25ج
909 خاص مكيف توربيني القاهرة الإسكندرية 09:00ص 11:30ص أولى مكيف
ثانية مكيف
70.8ج
45.25ج


مواعيد القطارات المكيفة و أسعارها بين اسكندرية القاهرة

رقم القطار نوع
القطار
من إلى وقت
القيام
وقت الوصول الدرجة السعر
902 اكسبريس
مكيف أسباني
الإسكندرية القاهرة 06:00ص 09:15ص أولى مكيف
ثانية مكيف
52.4ج
30.25ج
906 خدمة خاصة الإسكندرية القاهرة 07:00ص 09:40ص أولى مكيف
ثانية مكيف
104ج
70.8ج
900 اكسبريس
مكيف أسباني
الإسكندرية القاهرة 08:15ص 11:15ص أولى مكيف
ثانية مكيف
52.4ج
30.25ج
910 اكسبريس
مكيف أسباني
الإسكندرية القاهرة 10:00ص 12:55م أولى مكيف
ثانية مكيف
52.4ج
30.25ج


وبالنسبة للميكروباص والأتوبيس، فالاتنين بياخدوا الطريق الصحراوي، وبيوصلوا في 3 أو 4 ساعات تقريبا، ونقطة الوصول بتكون محرب بك لأن الموقف هناك.
ودي عناوين وأرقام تليفونات بعض مكاتب النقل البري في القاهرة

شركة النقل البري مكان المكتب رقم التليفون
السوبر جيت ميدان الجيزة 35725032
السوبر جيت ميدان الماظة 22909017,22909013
السوبر جيت مصر الجديدة, القاهرة 22660214,22660212
الجونه ميدان عبد المنعم رياض 25741533-25741533
غرب الدلتا المطار القاهرة 022652338,022914255

ولو قررت تسافر طيران المسافة ما بين 30 إلى 45 دقيقة والإقلاع بيكون من مطار القاهرة لمطار برج العرب، وفي أكتر من رحلة خلال اليوم وأسعار التذاكر دلوقتي بين القاهرة واسكندرية بتبدأ من حوالي 1700.
ودا دليل إسكندرية لكل شركات الطيران
http://bit.ly/2nyyXgN

زحمة في الإسكندرية

ولما توصل إسكندرية أول حاجة هاتلاحظها الزحمة، لأنها مدينة حية وأهلها بيعزو السهر خاصة في الصيف وعلى الكورنيش، الموضوع بيختلف طبعًا في الشتا بالليل بتكون هادية وفاضية.
وعموما خدها مني نصيحة، خلال وقت الذروة ابعد عن شارع أبوقير، وحاول تاخد طريق الكورنيش أو بورسعيد، وأوقات الذروة بتكون 8 صباحًا، وكمان 12 و 2 مساء، و بالليل ما بين الساعة 8 و9.

إسكندرية

هتبات فين؟

على طول الكورنيش من بحري لغاية أبوقير كل دا مليان فنادق، أما العجمي والساحل فتقدر تأجر شقة أو شاليه.
بالنسبة للشقق أغلب إيجارات المصايف موجودة في منطقة سيدي بشر في خالد بن الوليد ومحمد نجيب والعيسوي أو منطقة ميامي والعصافرة والمعمورة وأبوقير.
إيجار الشقق في الصيف بيبدأ من 1000 جنيه في الإسبوع، وفي أماكن توصل لـ400 أو 600 جنيه في اليوم وساعات 1000 جنيه في اليوم.
أما في الشتا بتقل أسعار الإيجارات شوية، وبتزيد طبعا مع المواسم والأعياد، بس عموما لازم تاخد لفة وتشوف أفضل الأسعار، لأن أغلب الشقق مش بتختلف كتير.

شقق مفروشة متوفرة

أول ما تنزل من القطر حتلاقي ناس بتقول شقق مفروشة للإيجار و كمان معلومة مهمة ليك منطقة أبوقير أغلبها برضو شقق للإيجار، وأسعارها بتكون أقل من أسعار الشقق في المناطق التانية.
أما الفنادق فعندك منطقة زي المنشية أو محطة الرمل لو عايز تعيش في إسكندرية القديمة،  وعلى طول الكورنيش في فنادق كتير، بنرشحلك دول

الفندق المكان رقم التليفون الأسعار المستوى
فور سيزون 399 طريق الجيش سان استيفانو 033581800 280 دولار الليلة 5 نجوم
هيلتون سيدي بشر 544كورنيش سيدي بشر 03 5490935 135 دولار
الليلة
5 نحوم
شيراتون المنتزة المنتزة كورنيش 035401331 – 035505197  تبدأ من 67 دولار الليلة 4 نجوم
جراند رويال 9 ش البورصة القديمة,محطة الرمل 034881111 – 034832913 1,200 جنيه 4 نجوم
بارديس إن المعمورة شاطئ المعمورة 0335473383 700 جنيه 4
الإسكندر الأكبر 5 شارع الأسقفية أمام سانت كاترين المنشية 034872141 -01225603476 300-400 جنيه 3
المدينة المنورة 27 شارع المشير سيدي جابر 035452160 – 035453009  200 جنيه 2
فندق هايد بارك “بنسيون” 21 ش امين فكرى محطة الرمل الإسكندرية 03-4875666, 80-95 جنيه بدون

إسكندرية
موصلاتك هنا

قبل ما أكلمك عن الأكل و الشرب والأماكن الحلوة لازم تعرف إزاي تتحرك في البلد.
عموما في إسكندرية صعب جدا تتوه لأنها من ساعة ما اتخططت في عهد الإسكندر الأكبر وهي أخدت نفس الشكل، خطوط طولية وعرضية يعني أي شارع عرضي لو مشيته هتعدي على التقاطعات الرئيسية الطولية لحد الكورنيش.
الشوارع الرئيسية في إسكندرية هي شارع الكورنيش- بورسعيد – الترام – أبوقير
كورنيش إسكندرية طوله حوالي 25 كيلو متر بيعدي على غرب وشرق ووسط إسكندرية، فهاتلاقي أكتر من وسيلة مواصلات من من أول أبوقير لحد بحري.
لو مشوارك بعيد جرب “أوبر”  هايكون أفضل حل،  أما لو هاتاخد تاكسي إسكندرية يبقى اتفق  على الأجرة قبل ما تركب، وغالبا لو مشوارك مثلا من محطة الرمل لسيدي جابر هتدفع حوالي 15 جنيه، ولو للمنتزه من 25-30 جنيه.
السيرفيس أو اللي بيسموها أهل إسكندرية “المشروع”، و دول هتلاقي اليافطة اللي بيروحلها مكتوبة قدامه.

اعرف الميكروباصات

اتجاه المنشية لو رايح على وسط البلد أو البحر، واتجاه بحري يعني لحد القلعة وراس التين، والعكس في العودة  اتجاه المندرة ومن هناك في ميكروباصات بتحمل لحد أبو قير ، وفي اتجاه العودة ميامي، وسيدي بشر
أما أتوبيسات النقل العام وفي منها بيكون لحد الأنفوشي وفي العودة للمندرة والمعمورة والتذكرة ما بين 2 لـ3 جنيه، وفي العادة أغلب أتوبيسات النقل العام اللي بتعدي على البحر بتطلع من المعمورة بلاج لحد الأنفوشي و بحري وفي اتوبيس 732 بيعدي على شارع أبوقير ويطلع من سيدي جابر  على البحر للأنفوشي و 731 من العوايد للأنفوشي
أما الأتوبيس الدورين أجرته بتكون 7 جنيه للفرد VIP وبيطلع من المعمورة البلاج لحد بحري

خلي بالك
في اتنين معمورة: معمورة البلاج ومعمورة البلد، البلاج سياحية أما البلد منطقة سكنية شعبية.
وكمان فرق بين منطقة أبو قير وشارع أبوقير أحد الشوارع الرئيسية في إسكندرية.
وكمان بين منطقة سيدي بشر بحري السياحية، ومنطقة سيدي بشر قبلي القريبة من القطر.

ترام اسكندرية 

أكيد بتسمع عن ترام إسكندرية وده علامة مميزة للمدينة، لازم تجرب تتفسح بيه، وهايكون عندك: ترام 1 باكوس، وده من اول فكتوريا لغاية محطة الرمل، بس بيعدي على محطة باكوس و شوتس و جناكليس في وسط الطريق، وتذكرته ما بين 50 قرش إلى جنيه.
أما ترام النصر رقم 2، فدا بيطلع من أول فيكتوريا، لغاية محطة الرمل وتذكرته ب50 قرش، وهاتلاقي عربية فيها دورين العربية اللي فوق دي عبارة عن كافيه تذكرته بـ5 جنيه، ودا بيعدي على زيزينيا وجليم.
كمان فيه حاجة اسمها ترام كافيه، وده ترام صغير بـ5 جنيه وبيكون متاح فيه  WIFI وتلفزيون LCD، وبيبدأ من سان ستيفانو لحد محطة القائد إبراهيم والعكس.
ومن محطة الرمل فيه ترام بياخدك من هناك لبحري عشان لو عايز تروح راس التين، وتذكرته بجنيه.
وعشان تعرف مواعيد النوات في الإسكندرية وتيجي في يوم يكون الجو فيه كويس إعرف مواعيد النوات على الرابط التالي:
http://bit.ly/2nCQI00

لو جعان تعمل إيه؟

كذلك بعد اللف الكتير في إسكندرية هاتحتاج تاكل لا مفر، وأحلى وأطعم حاجة تاكلها في إسكندرية هي السمك طبعا، وأنصحك تجرب تشتري سمك طازة من السوق وتشويه أو تقليه بنفسك.

كما أن أحلى محلات السمك هاتلاقيها في محطة الرمل وبحري، ودي قائمة بأفضل محلات السمك:
سي جال وفيش ماركت: موجود في بحري قريب من حلقة السمك على الكورنيش حلو  بس أسعاره غالية.
قدورة:   في بحري قريب من الأنفوشي على الكورنيش من الجهة التانية وبرضو تقل جيبك
راقودة في الشاطبي على الكورنيش، بس أسعاره مرتفعة
لو برنس   مطعم سمك جوه حدائق المنتزه برضو ممتاز بس أسعاره عالية
عروس البحر: عند جامع المرسي أبو العباس نضيف وأسعاره متوسطة
أبو أشرف: مطعم شعبي

سوق زنانيري

كمان لازم تجرب تروح سوق زنانيري في كليوبترا ، وهناك ممكن تشتري سمك وتقليه في نفس المكان، وكمان مش غالي.
منطقة محطة الرمل بتفرعات شوارعها فيها  أشهر المطاعم القديمة زي تريانون وديليس، مديرة المطعم دا يونانية وعايشة في مصر،  وعنده كمان أكلات وحلويات يوناني وأوروبي ننصحك تجرب الماكرون بتاعهم وهمي وسعره معقول.
وفي شارع فؤاد حتلاقي مطاعم وكافيهات كتيرة، دا غير انه من الشوارع القديمة في إسكندرية، من المطاعم دي: روستري ومجمع مطاعم لو بساج، و في نفس الشارع حتلاقي كافيه كوستا كافيه.
أما  لو بتحب المطاعم السوري أو التركي، فهاتلاقي أشهر المطاعم في إسكندرية: الريف الدمشقي، وسبورتينج على البحر، والتركي والسلطان أيوب.
ولو عايز تجرب حاجة جديدة تمامًا يبقى عليك وعلى ألبان سويسرا في كامب شيزار (خد الترام) هناك هيجيلك الأكل في طاسة وكل الأطباق داخل فيها الجبنة السويسري.

الشيخ وفيق

بعد جولة المطاعم دي انت  لازم تروح تاكل رز باللبن بالأيس كريم من الشيخ وفيق في راس التين، هايعجبك جدا
و العصاير الطبيعية منتشرة في كل حتة على الكورنيش و جوه و أشهرهم خروب أمال في شارع صفية زغلول بمحطة الرمل لازم تجرب الخروب و خروب سامي في الإبراهمية على شارع ابو قير خروب و تمرهندي يجنن و عصائر مكة ليه فروع كتير في اسكندرية سبورتينج، ثروت في سموحة.
و متقلقش الماشي على الكورنيش و نزول الميه حيهضم كل ده عشان البحر بيجوع
http://bit.ly/2oBtODM
القهاوي والكافيهات من الحاجات اللي لازم تجربها في إسكندرية، واللي موجودة بطول الكورنيش على الناحيتين، أرشحلك قهوة فاروق في بحري على الكورنيش ودي كان يقعد فيها الملك فاروق، وعندك كمان قهوة هندي في المنشية عمرها 100 سنة تقريبا، وقهوة السلطان حسين في شارع صفية زغلول، وقهوة شعبان جنب أوبرا سيد درويش.
أما لو غاوي بُن فيبقى لازم تشرب من البن البرازيلي وسفيانوبولو (آه لازم تجرب الاتنين)
لمزيد من المعلومات عن مقاهي الإسكندرية على الرابط التالي:
http://bit.ly/2odUIW9

أهم مزاراتك السياحية في اسكندرية

مادام قولنا اسكندرية يبقى أكيد هانسأل عن الشواطئ والبحر، في العجمي عندك “الفردوس بيانكيمن الشواطئ الخاصة وأسعار دخول الشاطئ بتتغير من سنة للتانية و شاطئ “أوكسجين” في العجمي بيطاش، وفي شاطئ “شهر العسل” و“الهانوفيل” و هو من الشواطئ المجانية في الدخول لكن طبعا بتأجر الشماسي وو الكراسي وأسعارها مش مرتفعة وفي بنظام الخدمة حسب الطلب زي “زهراء الهانوفيل” و في شواطئ مميزة زي “البيطاش 1و2، و “الهانوفيل”، و “ابو تلات 1 و2” لكن خلي بالك الموج هناك عالي.
شواطئ مجانية تانية زي “شاطئ سيدي كرير” بسيدي كرير، “المكس” بالمكس.
لمزيد من المعلومات عن شواطئ الإسكندرية على الرابط التالي:
http://bit.ly/2nmwtRz

نيجي بقى على الأماكن الترفيهية

اسكندرية بلد الفن و هنا كانت بيسموها زمان باريس مصر و صناع السينما والمسرح بدأوا من هنا عشان كده حتلاقي دور سينما كتير خاصة في منطقة وسط البلد محطة الرمل في سينما أمير في شارع فؤاد و سينما فريال على ترام محطة الرمل و سينما مترو في شارع صفية زغلول جنب خروب آمال، و ديه اسعارها شعبية مش غالية
في سينمات تذكرتها مرتفعة شوية و فيها كمان افلام 3D بتنزل زي سينما مول سان ستيفانو و جرين بلازا  سموحة و في سينما ديب مول في رشدي، وسينما زهران في سموحة.
أما المسارح اللي ممكن تلاقي فيها عروض مسرحية زي مسرح بيرم التونسي في الشاطبي على البحر على طول أرقامهم للاستعلام 03 5913835
و مسرح الليسية الحرية شارع الإسكندر الأكبر الشاطبي ارقام الاستعلام 03 5913794
وفي كمان مسرح الأنفوشي وده بتقام في عروض للثقافة الجماهيرية مجانية و في مسرح عبد المنعم جابر في كامب شيزار على البحر وده مجمع مسرح وسينما و في مسرحيات قطاع خاص
لمزيد من المعلومات عن التراث الفني بالإسكندرية على الرابط التالي:
 http://bit.ly/2nmDods

مركز الفنون بمكتبة اسكندرية

و لازم تتابع فعااليات مركز الفنون بمكتبة اسكندرية عشان بيعملوا حفلات و عروض مسرحية رائعة وعروض في القبة السماوية  للأطفال في مكتبة اسكندرية
ممكن تتابع فاعليات مكتبة الفنون على اللينك ده و في طريقة التواصل و اسعار تذاكر الحفلة اللي عايز تحضرها http://www.bibalex.gov.eg/ar/center/details/artscenter
وضروري جدا تعدي على أوبرا سيد درويش في شارع فؤاد محطة الرمل و تعرف بروجرام الحفلات الغنائية و الراقصة فيها  او تدخل على صفحتهم الرسمية على الفيسبوك http://www.cairoopera.org/VenuesDetails.php?id=6
و لو مشيت قدام شوية في نفس الشارع حتلاقي قصر الإبداع أو مركز الحرية للإبداع من المباني التراثية من أيام زمان، وهو تابع للوزارة الثقافة بتقام فيه حفلات وعروض مسرحية مجانية أو بأسعار رمزية، كما يمكن أن تتابع فاعلياتهم و التواصل معاهم من خلال صفحتهم  الرسمية على الفيسبوك https://www.facebook.com/Ebda3Elhoria/
أيضا في مكان فاعليات فنية بينظمها مركز الجزويت الثقافي في شارع بورسعيد سيدي جابر و ممكن تتابع من خلال صفحتهم على الفيسبوك
https://www.facebook.com/Jesuits-Cultural-Center-in-Alexandria-155597931175403/
وفي أماكن ترفيهية للشباب والأطفال داخل المعمورة بلاج في ركوب عجل و بيتش باجي و كمان في ملاهي المعمورة

المزارات التراثية والأثرية

مبدئيا كده أغلب المزارات الأثرية هي في مربع اسكندرية القديمة او اللي كان اسمه زمان المربع الملكي و ده من سوتر و الشاطبي لغاية المنشية:
قلعة قايتباي: في منطقة بحري على البحر مباشرة مكان فنار الإسكندرية القديم اللي كان من عجائب الدنيا السبع قبل ما يتهدم و تتطلع بداله القلعة اللي بترجع للعصر المملوكي و هناك ممكن تركب مركب تتفسح في البحر بعد ما تزور القلعة.
المرسي أبو العباس: في بحري على البحر قبل القلعة جوه حتلاقي مسجد ومش بس كده هتلاقي أكبر مكان لألعاب المولد اللي بتتصنع هناك وحقيقي ألوانها مبهرة، و مولد المرسي أبو العباس بيحتفلوا بيه في شهر 7.  
المتاحف: أهمها متحف الأحياء المائية و متحف المجوهرات الملكية و مركز محمود سعيد للمتاحف و متحف الآثار  الغارقة و متحف شادي عبد السلام بمكتبة ومتحف كفافيس وفي اللينك ده هتلاقي أرقام تليفونات المتاحف و العناوين
http://www.alexandria.gov.eg/services/Daleel/Museum.aspx
مكتبة اسكندرية: أعيد بناءها في نفس مكان اللي كانت في مكتبة الإسكندرية القديمة في الأزاريطة على شكل نص قرص شمس و جوها مزارات كتير و مباني ممتدة لحد شارع سوتر اللي بتواجه مجمع كليات جامعة اسكندرية
لمزيد من المعلومات عن مكتبة الإسكندرية على الرابط التالي:
http://bit.ly/2nmx2e7
كوبري استانلي: رغم انه مش من كتير اتبنى لكن أصبح من معالم اسكندرية اللي مهم تتمشى عليه و تاكل ترمس ودرة و نشوف البحر على الجانبين.  

شوارع تراثية أثرية اوعى تفوتك

شارع فؤاد في محطة الرمل: من أكتر الشوارع اللي فيه مباني تراثية وأثرية.. وهتلاقي فيه متحف اسكندرية القومي وأقدم الجوامع والأضرحة ومباني على طرز أوروبية.. كما توجد سينما أمير و دار أوبرا اسكندرية و قصر الإبداع.. وفي تفرع من نفس الشارع تدخل حي كوم الدكة اللي اتولد فيه الفنان سيد درويش..

وهناك هتلاقي مكان تراثيي أثري و حي شعبي، ناس بسيطة وأجانب وفنانين كتير بيجوا يصوروا المكان ويرسموه.

شارع النبي دانيال: هتلاقي في الشارع ده المعبد اليهودي و الكنيسة المرقصية وجامع النبي دانيال.. وفي آخره قبل ما توصل محطة مصر هتلاقي بياعين الكتب القديمة والمستعملة شبه سور الأزبكية في القاهرة.
أيضا لمزيد من المعلومات عن شارع النبي دانيال تابع الرابط التالي:
http://bit.ly/2obuTWh
شارع فرنسا و زنقة الستات في المنشية:

هتلاقي مباني قديمة تراثية وأثرية وعطارة و تجار الجملة للأقمشة والخيوط والأكسسوارات و تجهيز العرائس.

حدائق ومتنزهات

حدائق تراثية وأثرية:

كما توجد حدائق المنتزه تجنن برسم دخول 12 جنيه للفرد، وجمالها إنك تقضي اليوم الصبح مع العائلة.
وحدائق الشلالات:

وديه في وسط البلد على شارع أبوقير قبل شارع فؤاد ودخولها مجاني.. بس نصيحة اقعد في الكافتيريا بلاش في أي حتة في الحديقة، وبالمناسبة المنطقة دي كلها أثرية و فيها معالم يونانية.

أيضا عندك استاد اسكندرية وحديقة حيوان النزهة وحديقة انطونيادس دي بحوالى 5 جنيه رسم دخول الفرد مكانها في سموحة.

كما يمكن اتلحصول على مزيد من المعلومات عن حديقة حيوان الإسكندرية على الرابط التالي:
http://bit.ly/2nj0xN9

في النهاية هناك أماكن كتير أثرية في اسكندرية زي:

عامود السواري

حي كرموز

المسرح اليوناني الرومان

مقابر الشاطبي

معبد الرأس السودا

مقابر الأنفوشي

فيلا الطيور بكوم الدكة

مقبرة سلفاجو و تيجران في كرموز

مقابر مصطفى كامل.

كما يمكنك متابعة لينكات على قناة ولاد البلد عن الإسكندرية:
مكتبة الإسكندرية
https://www.youtube.com/watch?v=zUjUuDUBgus
https://www.youtube.com/watch?v=w_U0vtcfJUA
عصير القصب حدوتة مصرية شعبية
https://www.youtube.com/watch?v=3btsB_7Z0cE&t=20s
وكالة بهنا
أصل تسمية شواطئ الإسكندرية
“نوبة نوتو ” تحي تراث النوبة في أفراح الإسكندرية

النبي دانيال 
حكايات مقاهي الإسكندرية المنسية
حديقة حيوان النزهة

مشاركة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
باب مصر