المسحراتي فؤاد حداد: تاريخ جديد
تاريخ جديد
اصحى يا نايم
وحّد الدايم
وقول نويت
بكرة إن حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتي
مـنـقـراتي
وانا قلبي راضي
أنا قلبي رايق
أنا قلبي طايق
سبع طرايق
على الوريد
الأوله دي
عيون ولادي
صبح ميلادي
بتاريخ جديد
والتانية ساير
تحت المناير
رمضان يناير
طالع سعيد
والتالته عيني
على البريد
بينك وبيني
سكة حديد
والرابعة داخ اللي
قلبه داخل لي
يبقى دا خلّي
بالأكيد
والخامسة أمسِي
فرش في شمسي
أنا اللي همسي
صبح نشيد
والساتّه يومي
جميل في قومي
أنا اللي صومي
وصلاتي عيد
والسابعة بشرى
من قبل بكرة
على كل أكرة
يبقى لي إيد
عصر العجايب
جايب مجايب
جايب ما جاب لي
والمشي طاب لي
والدق على طبلي
ناس كانوا قبلي
قالوا في الأمثال:
“الرجل تدب مطرح ماتحب”
وانا صنعتي مســحـراتي في البلد جوال
حبيت ودبيت كما العاشق ليالي طوال
وكل شبر وحتة من بلدي
حتة من كبدي
حتة من موال:
يا ليلي يا عين أنا حالف ما اغمض عين
دا أنا إن شقيت قلت آه ريحت قلت آهين
صبح الشقا زين
لعيون تزامل قمر كامل يؤانسها
وعيون كما العيلة دايرة بفوانيسها
وعيون تقول أنا حاهدي الفجر موالي
ولا حد يسهر ليالي وفي الأوان يسهى
فؤاد حداد- 1964، من ديوان المسحراتي- الهيئة العامة للكتاب
