عشان كدا قالوا "الأقصر بلدنا بلد سواح"

الأقصر زي ما فيها تلت آثار العالم، الطبيعة هناك برضه تاخد العقل، البلد دي مش آثار وبس، الاقصر يعني الجمال والجدعنة والناس الطيبة، عشان كدا الاقصر بلدنا بلد سواح.

أفضل وقت تروح فيه الأقصر هو الشتا أو فترة الربيع، لأن الجو بيكون حلو والشمس دافية، في الصيف الجو بيكون حر شوية، ولازم تحترس منها، بس في الحالتين انت هاتستمتع.

أنسب طريقة تيجي بيها الأقصر هي القطار، ومنصحكش تيجي بالعربية عشان المسافة بعيدة وهاتتعب.

ودي مواعيد القطارات من القاهرة للأقصر:

القطارات vip

– قطار رقم 976 قيام من القاهرة الساعة 9 مساءً

– قطار رقم 2008 قيام من القاهرة الساعه11 مساءً

أما القطارات المكيفة:

– قطار رقم ٩٨٨ قيام من القاهرة الساعه ٧ مساءً

– قطار رقم ٩٩٦ قيام من القاهرة الساعة ١٠ مساءً

– قطار رقم ٩٣٤ قيام من القاهرة الساعه ١ مساءً

بعد ما توصل الأقصر لو محتاج تستفسر عن أي حاجة، هاتلاقي في وشك مبنى “مركز الاستعلامات السياحي” هيفيدوك جدًا ومتعاونين جدًا.

بمجرد خروجك من المحطة هتلاقي عربيات تاكسي كتير، وتعريفة التاكسي بـ10، أو المواصلات العامة هتلاقيها منتشرة قدام المحطة تعريفتها بـ1 جنيه.

الإقامة بقي والزيارات

شوف يا سيدي أولا لازم تعرف إن الأقصر عبارة عن منطقتين والنيل وسطهم: البر الغربي والبر الشرقي، وعشان تروح من البر الشرقي للغربي أو العكس، اركب “معدية” بـ”ربع جنيه”، فالموضوع سهل.

وبالنسبة للإقامة في البر الشرقي، بنرشحلك الآتي:

– فندق القديس، “3 نجوم” تكلفة الإقامة 185 للفرد شاملة ثلاث وجبات.

– فندق إيزيس بيراميزا الأقصر، ودا على كورنيش النيل في وسط المدينة، على بعد كيلومتر من معبد الأقصر، بيوفرلك غرفة مكيفة على النيل، في وسط مدينة الأقصر، سعر الغرفة المفردة شاملة الإفطار 450 جنيهًا

-فندق إيتاب، ودا جنب ديوان عام المحافظة بين معبد الأقصر ومتحف الأقصر، سعر  الغرفة المزدوجة 500 جنيه لليلة شاملة الإفطار.

– فندق الجولي فيل، ودا تقدر تقول انه منتجع موجود على جزيرة خاصة، وهاتلاقي فيه أكثر من 10 مطاعم، سعر الغرفة المزدوجة 1500 لليلة شاملة الإفطار.

فندق نفرتيتي، موجود في وسط البلد قدام معبد الاقصر، وممكن تحجز بالتليفون: 01000329991- 01006016132، سعر غرفة لفرد واحد 250 جنيه بالإفطار، لو غرفة مزدوجة سعرها بيكون  350 جنيه، وهاتلاقي غرفة 3 أفراد سعرها 450 جنيه.

أما بالنسبة للإقامة في البر الغربي

بنرشحلك فندق المرسم “مرسم الفنان محمد ناجي”.

الفندق مصمم على الطراز العربي القديم، مكانه ورا منطقة تمثالي ممنون، ممكن تعتبره فندق صديق للبيئة، وإيجار الغرفة المزدوجة ما بين 350 إلى 400، شاملة وجبة الإفطار.

-فندق كليوباترا، وميزة الفندق دا إن المطعم على السطح يعني هاتشوف الاقصر كلها من فوق، مكانه على بعد 4 كم من معبد حتشبسوت.

حجز الغرفة المفردة يكلف 180 جنيه بوجبة فطار، أما حجز الغرفة المزدوجة بـ250 جنيه.

-فندق كريم، وفيه تراس على السطح بيخليك تشوف معبد الملكة حتشبسوت ومقبرة طيبة، يبعد عن المقابر الفرعونية مسافة 15 دقيقة بالعربية، وهيكون بينك وبين النيل 10 دقايق مشي.

سعر الغرفة المفردة ليلة واحدة 80 جنيه من غير وجبات، أما الغرفة المزدوجة فتكلف 140 جنيهًا.

هاتاكل فين؟

الاقصر مفيهاش مطاعم فول وطعمية كتير، ممكن تحتاس على عربية فول، بس فيها كافيهات وكافيتريات كتير،فيها الأكل اللي انت عايزه وأسعارها مش غالية.

عندك نادي الزراعيين بنزلة الزناتي بالعوامية، وعندك كافيتريا “تيتو” على امتداد شارع التليفزيون، مشهور بالأكل السوري، وعندك كمان  كافيتريا عرابيا بالعوامية جنب قصر ثقافة الأقصر.

بعد ما تفطر، هايكون معاك جولة في  شارع السوق السياحي أو “سوق سافوي، ودا فيه جميع أنواع الهدايا التذكارية والتماثيل الفرعونية والتحف الفنية، وهناك هتلاقي ناس يقدروا ينقشوا اسمك على الرمل في إناء مزخرف بالرمل الملون، أو ينقشوا اسمك على قلادة.. باختصار انت لازم تعدي على المكان دا.

طيب لو معاك أطفال وحابب تفرحهم وتفسحهم وتخرج من جو الآثار شوية يبقى انطلق إلى “الندى لاند” ودي حديقة حيوانات ومدينة ملاهي، هاتلاقي هناك برضه مطاعم وكافيتريا وطريقها ميتوهش هاتركب سيرفيس “الموقف” بجنيه ومن الموقف اركب عربية “أرمنت” بـ2.5 جنيه وقول للسواق ينزلك عند الندى لاند، وتذكرة الدخول بـ5 جنيه.

مش هاوصيك بعد مشوار ندى لاند انت محتاج تاخد جولة في النيل… أيون عشان تشوف جمال الطبيعة على حق، ودا أسهل حاجة ممكن تعملها في الأقصر، ما عليك إلا أنك تقف على الكورنيش وتتفق مع أي فلوعشان تاخد جولة وسط آثار البر الغربي والبر الشرقي.

لو لوحدك ممكن تتفق مع صاحب الفلوكة على الأجرة وبتكون ما بين 30 لـ50 جنيه في الساعة، أما لوكنتوا مجموعة فالفرد الواحد 5 جنيه.

بعد جولة النيل، باقي تاخد جولة بالحنطور بقى، هاتلاقيهم منتشرين في كل مكان في الأقصر، ودا أجرته بالاتفاق برضه بين 30 لـ50 حسب المسافة، ورشحلك تأجر من عند ميدان سيدي أبوالحجاج لحد معبد الكرنك، الجولة كلها هاتكون ع الكورنيش، هاتكلفك من 20 لـ30 جنيه تقريبا.

طيب كدا انت اتفسحت في البر والبحر، باقي تتفسح في الجو، عشان كدا لازم تجرب رحلة البالون.

طيب تروح إزاي؟

هاقولك يا سيدي، في الأقصر فيه أكتر من شركة بتأجر رحلات البالون، وممكن تحجز رحلتك على البالون أون لاين، أو تتصل على أي شركة، الموضوع بسيط.

بمجرد الحجز هتتواصل معاك الشركة، وقبل معاد الرحلة هتبعتلك مواصلة تاخدك من مكانك لمطار البالون، وبعد ما تخلص رحلتك هايرجعوك لمكان إقامتك تاني.

معظم أسعار رحلة البالون للمصريين بتتراوح بين 400 لـ500 جنيه، وبيكون في تخفيض للعائلات.

بنرشحلك الشركات دي

شركة ماجيك هورايزون للبالون الطائر

الموقع الإليكتروني: http://www.visitluxorinhotairballoon.com

وعنوانها شارع خالد بن الوليد متفرع من التليفزيون بوسط المدينة

التليفون: 0020952274060

أو إيميل:  booking@magichorizon.com

أو شركة سندباد للبالون الطائر

الموقع الإليكتروني:

http://www.sindbadballoons.com/contactus.php

وعنوانها شارع عبد الحميد العمدة، جزيرة العوامية، الأقصر

التليفون: 01005385533

إيميل: info@sindbadballoons.com

أما  آثار الأقصر

أكتر حاجة ممكن تعملها في الأقصر هي انك تزور الأماكن الأثرية، الأماكن الأثرية كتير، عشان كدا لازم تعمل خطة لزياراتك، وتقسمها ما بين البر الشرقي والبر الغربي.

آثار البر الشرقي

في البر الشرقي ممكن تزور معبد الأقصر،  تذكرة الزيارة 10 جنيه، والمعبد شارك في تشييده 5 حضارات “حضارة فرعونية – يونانية – رومانية – قبطى – إسلامىة.

في الأصل كان مبني لعبادة الإله «أمون رع» وكان يحتفل بعيد زفافه لزوجته مرة كل عام هناك، فكان موكب الإله ينتقل من معبد الكرنك إلى معبد الأقصر.

اقرا عنه أكتر عن الموضوع من هنا: http://bit.ly/2mCRyHK

بعد ما تاخد جولتك في معبد الأقصر، هاتلاقي جنبه مسجد أبوالحجاج الأقصري، ادخل اقراله الفاتحة هو والقديسة تريزا.

اقرا أكتر عن الموضوع: http://bit.ly/2jOJiFI

معابد الكرنك

أيوه معابد مش معبد، عشان بالإضافة لمعبد الكرنك فيه أكتر من معبد تاني، والمنطقة اسمها قدس الأقداس، ومن داخل معبد الكرنك هتقدر تشاهد عروض الصوت والضوء، حاجة مدهشة كدا بتببدأ في المسا وتحكي قصة بناء المعبد..اقرا أكتر من هنا: http://bit.ly/2nFbJVW

تذكرة دخول معبد الكرنك 10 جنيه، تبدأ الزيارة من 7 صباحا حتى 5 مساءً، وتذكرة حضور الصوت والضوء 25 جنيه.

بتذكرة الدخول 10 جنيه تقدر تزور أكتر من مكان في معابد الكرنك، منهم “طريق الكباش”، ودا عبارة عن صفين من التماثيل كل منهم رأس كبش وجسد أسد.

وكمان معبد رمسيس الثالث، ودا كان مخصص لاستراحة المراكب المقدسة لثالوث طيبة في عهد رمسيس الثالث.

وبرضه البحيرة المقدسة، وجنبها الجعران الضخم، منقوش على قاعدته صورة امنحوتب الثالث وهو راكع، وهناك ممكن تلاقي سياح بيطوفوا حواليه عشان جلب الحظ.

خلصت جولتك في معابد الكرنك، خش بقى على متحف الأقصر، ودا على كورنيش النيل، وفيه قطع مهمة من معابد ومقابر الأقصر، وتذكرة دخوله 30 جنيه.

بس خد بالك المتحف بيقفل الساعة 2 الضهر، وبيفتح تاني من 5 لـ9 مساء.

مزارات البر الغربي

الضفه الغربية عموما كان اسمها قديمًا مدينة الأموات، وفيها مقابر ومعابد جنائزية كتير، أهمهم:

مقابر وادى الملوك والملكات، هاتحتاج تأجر طفطف بـ4 جنيه عشان تتجول بمزاج  داخل المكان.

مقابر وادي الملوك  منحوتة في الصخر، بتضم مقابر لملوك كتير أشهرهم مقبرة توت عنخ آمون.

اقرا أكتر عنها: http://bit.ly/2nzU9FR

وفيها كمان مقابر خاصة بزوجات الفراعنة، وأشهرها مقبرة نفرتاري زوجة الفرعون رمسيس الثاني.

أما مقابر دير المدينة فتختلف كتير عن مقابر النبلاء في الاهتمام بحجرة الدفن، وفي الرسومات الرائعة.

الديرالبحري، ودا مكان خيال خيال شيدته الملكة حتشبسوت، لأداء بعض الطقوس التي ستفيدها في العالم الآخر.

خلصت جولتك في المقابر، هايتبقى معاك المعابد وتذكرة الدخول 10 جنيه، بنرشحلك معبد الملك رمسيس الثالث بمدينة هابو، الغريب انه لسه محتفظ بألوان، معبد الملكة حتشبسوت وهاتحتاج تركب طفطف بتذكرة 2 جنيه.