“على بلد التاريخ وديني”.. خمسة سياحة عند السوايفة

كتب: سارة سالم
تصوير: هادي سيد

بني سويف كانت في العصر الفرعوني عاصمة مصر، فهي محافظة أثرية  من الدرجة الأولى.. كل حاجة هنا ساب التاريخ عليها علامة، حتى أصبحت بلد التاريخ.
ورغم الطابع الأثري ده لمحافظة “بلد التاريخ” إلا أنها في المقابل مدينة عصرية جدا وفيها كل الخدمات ووسائل استقبال الضيوف وراحتهم.. عشان كده لو عاوز تجربة جديدة وفريدة ومكان جديد مازرتهوش يبقا مافيش أحسن من بني سويف.

هنا هاتلاقي في بلد التاريخ كل حاجة سهلة وفي خدمتك.. بداية من المواصلات والفنادق والكافيهات، اللي هاتخلي إقامتك في بني سويف سهلة ومريحة.. أما عن المزارات السياحية اللي ممكن تلاقيها هنا.. فهي كتير أوي وبتتنوع ما بين مزارات تاريخية وقبطية وكمان سياحة نيلية وريفية.

هاتوصل إزاي لـ “بلد التاريخ”؟

بني سويف أو بلد التاريخ، تبعد عن القاهرة حوالي 124 كم، يعني ساعتين ونص سفر بس.. وفيه أكثر من طريقة تقدر توصل بيها من القاهرة وأسهلها القطر.. وسعر التذكرة 22 جنيه لو مكيفة درجه تانيه أسباني، وبتوصل إلى 37 جنيه لو هاتركب درجة أولى.

أما قطارات VIP فسعر التذكرة 45 جنيه للدرجة الثانية و65 جنيه للدرجة الأولى.. ودي مواعيد القطارات الي رايحة بني سويف من القاهرة.
992 مميز الساعة 1:21
977 مكيف الساعة 3:12
972  مميز الساعة 6:8
989 مكيف الساعة 8:54
981 مكيف VIP الساعة 17:54
2201 مميز الساعة 20:40

طرق أخرى للوصول إلى بلد التاريخ

والطريقة التانية اللي ممكن تروح بيها بني سويف، عن طريق أتوبيس شركة شرق الدلتا.. ورحلاتها تبدأ من الساعة 9 صباحًا وتستمر حتى الساعة 9 ليلا.. وفي كل ساعة بيطلع أتوبيس وسعره في المنيب 17 جنيه ولو من عبود 20 جنيه.

كذلك فيه طريقة ثالثة خالص وهي “الميكروباص” والناس بتعتبره أسهل وأسرع من القطر أو الأتوبيس.. وفيه من المنيب بـ 23 جنيه، ومن رمسيس بـ 25 جنيه.

أما بالنسبة للمواصلات داخل المحافظة، فأي تاكسي داخل المدينة نفسها بـ 6 جنيه، وأي سرفيس بجنيه وربع.

هاتبات فين

هانرشحلك أربع فنادق أولها فندق “توليب” وهو تابع للجيش، ومكانه في شارع البحر، وبيطل على النيل مباشرة، وأسعاره 530 جنيه للغرفة المنفردة، و630 للغرفة المزدوجة، وفيه فندق “ستي سنتر” وده أمام المحطة على طول، وميزته أنك هاتلاقي جنبه كل حاجه، لأن جنب شارع الرياضي، والشارع ده معروف بمحلات اللبس، فهاتقدر تتسوق فيه براحتك، وأسعاره 265 جنيه للغرفة المنفردة، و315 للغرفة المزدوجة.
أما بقى لو إنت بتحب الطابع القديم والأثري، يبقا نرشحلك فندق “قصر البكري” ده في شارع مقبل.. وهو شارع هادي ومعروف إن البيوت اللي فيه كلها أثرية وقديمة.. وأسعار الغرف فيه 320 للغرفة الفردية، و465 للغرفة المزدوجة.

ولو عاوز تتعرف على المجتمع بتاع بني سويف على الطبيعة.. فنرشحلك “فندق سميراميس” ده برضوا عند المحطة.. بس فندق شعبي شوية، وسعر الغرفة فيه 80 جنيه للغرفة الفردية، و100 جنيه للغرفة المزدوجة.

الأماكن اللي ممكن تزورها

بني سويف مشهورة بمنطقة آثار هرم ميدوم، وبتضم المنطقة الهرم والمعبد الجنائزي والطريق الصاعد ومصاطب الأمراء.. وكلها معالم تاريخية لعبت دور كبير جدا في تاريخ مصر القديم هاتحتاج إنك تعرفها لما تزور المكان.

 

وبالنسبة لسعر تذكرة الدخول 40 جنيه للمواطن الأجنبي، و20 جنيه للطالب الأجنبي.. وللمصريين 10 جنيه، و5 جنيه للطالب المصري.. والهرم عشان مشهور ففيه عربيات بتعدي عليه، فلو إنت جاي من القاهرة اركب من موقف المنيب سيارة الواسطى.. وقول للسواق عند واحة هرم ميدوم، وبعد انتهاء الزيارة اركب للواسطى ومن الواسطى للقاهرة.. لكن لو جاي من بني سويف إركب من موقف العبور سيارة الواسطى ومن الواسطى لواحة ميدوم هتكلفك 20 جنيه.

كهف وادي سنور

طبعا اللي هانقوله ده مفاجأة ليك، لأن بني سويف فيها مكان عبارة عن كهف طبيعي عمره 65 مليون سنة، وهو محمية طبيعية اسمها محمية كهف وادي سنور، وتقع على بعد 40 كيلومتر شرق مدينة بني سويف، والكهف ده قصته حكاية لأنه بيمتد لنحو 700 متر في باطن الأرض بعمق 15 متر، ويصل اتساعه إلى 15 متر تقريبا، وللأسف مالوش مواصلات من المحافظة، لازم تزوره مع رحلات منظمة.

أما لو كان معاك ولادك وأسرتك، فمفيش مشكلة هاتلاقي الحاجة اللي تناسبهم ويفرحوا بيها جدا، وهي حديقة الحيوان، فيها كل أنواع الحيوانات تقريبا اللي ولادك هايحبوا يشوفوها، ومكانها سهل جدا قدام جامعة بني سويف في العبور، هاتلاقيها جنب الطيارة على طول، وتذكرة الدخول 5 جنيهات، هاتلاقي في الحديقة من جوه كافتيريات كويسة، وهاتقضي يوم لطيف مع أسرتك.

حديقة النيل

وكمان عشان فرحة الولاد تكمل، فيه حديقة النيل، وموجود فيها ملاهي كتير، وتذكرة الدخول بـ 5 جنيه، والملاهي كل لعبة بتختلف في سعرها عن الثانية.
وعموما لو إنت من هواة المناظر الطبيعية والخضرة، فبني سويف فيها حدائق عامة كتير تقدر تتدخلها بلاش زي حديقة المنتزه، وحديقة عابدين، ونادي الإدارة المحلية بالكورنيش.

دير العدرا

ماينفعش تكون في بني سويف وماترحش دير العذراء مريم بقرية بياض العرب، والدير يبعد عن بني سويف حوالي 20 دقيقة بس، هاتركب من موقف بني سويف للدير بجنيه وربع، والدير ده يعتبر من التحف المعمارية في بني سويف، وموقعه خلاه فريد من نوعه لأنه بيطل مباشرة على نهر النيل، ومن هناك تقدر تاخد مركب وتستمع برحلة خيالية عمرك ماشفتها.
كمان بني سويف فيها مسجد السيدة حورية، ويعتبر من أهم المزارات السياحية والدينية في بني سويف، والمسجد أنشئ قبل عام 1905 بشارع أحمد عرابي، ويرجع نسب السيدة حورية إلى الإمام الحسين وهى زينب الصغرى، ابنة عبدالله بن شرف الدين بن الإمام الحسين، وقدمت إلى مصر مع الفتوحات الإسلامية الأولى، وعند عودتها أصيبت بالحمى وماتت فدفنت في بني سويف.
ويقام مولدها كل عام من شهر يونيو ويأتي زوارها من كل مكان للاحتفال به، والمولد من أهم مظاهر احتفالاته الأكلات الشعبية والملاهي الشعبية أيضا في محيط المسجد.

كريبات وكافيهات بني سويف

ماتنساش وانت في بني سويف تنزل بالليل تتمشى على كورنيش النيل، هتلاقي المنطقة كلها كافيهات، جرب تقعد في “كافيلو” ولما تروح اطلب بيتزا مش هتندم، وممكن تحلي بـ”الوافل” بتاعهم حكاية، وفيه كافيه “لاميرا” على الكورنيش برده، هناك مش هاقولك اطلب حاجة معينة، لأن المكان معروف بخدمته وِأكله، وعشان تاكل آيس كريم حلو، روح “وافل” على الكورنيش برضو، هناك الآيس كريم بالذات ليه طعم تاني.

كما نقدم لك نصيحة.. متاكلش الكريب من بره بني سويف، لأن بني سويف أول محافظة دخلت صناعة الكريب في مصر ومشهورة بيه، فيه محلات كتير للكريب في بني سويف.. لكن خليك في “فرندس والحلواني” ودول في مقبل، وماتنساش تفوت على محل “أوزي” المشويات وكل اللحوم فيه بلدي وحكاية.

كما يجب أن تأكل “الأوزي” أو كتف الخروف هايعجبك جدا، والمحل ليه فرعين في بني سويف.. واحد في شارع عبد السلام عارف والتاني على الكورنيش.. أما بقى لو هتاكل كشري، الأمر مايسلمش، فمفيش غير محلات البكري، وليها 3 فروع أفضل واحد فيها اللي في بني سويف الجديدة.

 

مشاركة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
باب مصر