المسحراتي7| أشعار فؤاد حداد.. صورة تعدل صورة

كتب – فؤاد حداد
تصوير – سمر شومان
المسحراتي
7- صورة تعدل صورة
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى على غصنى
شمس وقمر
يحرس ولادى ويحرسنى
اسم النبى
مشيت بصندوق الأيام
أقول لك اتفرج يا سلام
فى قلبى صوره وأغنيه
مبدأ تاريخ الوطنيه
أحمد عرابى على حصانه
يعرق شبابى فى قمصانه
مد النديم من أغصانه
طريقه فى دنيا الأحلام
أقول لك أتفرج يا سلام
النور ينسم فى النشره
تاخد بلادك بالاحضان
خد السما وهاتها فى نظره
فى يوليه وفى عاشر رمضان
وكل يوم أحفظ واقرا
واحدف بصوتى على قدام
واقول لك اتفرج يا سلام
شمس وقمر فاتحين زهره
وأم كلثوم السهره
والعصر يدينى محاضره
صوته حنين
لما يبيّن
شهادة الأرض الخضرا
لكل جهد كبير وصغير
فى قلبى أغنيه وصوره
تعدل صوره
تلاقى حل الفزوره
ترد روح الاسطوره
تكتبها فوق السبوره
ألف ألف اقلام اقلام
واقول لك اتفرج يا سلام
من غير لا دبكه ولا ربكه
الكوره بتحب الشبكه
اللى تجيب جون
على الهوا فى التليفزيون
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
يا قلبى لو قلت لى فوق التليفزيون
برج اللاسلكى يوصلنى بكل الكون
برج اللاسلكى يوصلنى لكل الناس
عمر الليله دى ما راح تبعد
عمر الليله دى بعمر الأرض
والأرض والسموات مسجد
برج اللاسلكى فى توب السنبله الحساس
يؤدى الفرض
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق
المسحراتي6| أشعار فؤاد حداد.. كوبري إمبابة
المسحراتي5| أشعار فؤاد حداد.. يوم العمل يوم عيد
المسحراتي 4| أشعار فؤاد حداد.. تونس الخضرا
المسحراتي3| أشعار فؤاد حداد.. تعرفني من صوتي

المسحراتي2| أشعار فؤاد حداد.. الحق واجب

المسحراتي 1| أشعار فؤاد حداد.. تاج المدينة أبوزيد هلال

مشاركة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
باب مصر