المسحراتي28| أشعار فؤاد حداد.. سندس أخضر
كتب – فؤاد حداد
تصوير – سمر شومان
سندس أخضر
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
سندس أخضر
مســحـراتى وباسحّر
على نغم سندس اخضر
نور النبات اللى مزهر
والرز والقمح مسنبل
مـنـقـراتى وباطبل
على نغم بحرى مقبل
غيطانا يا ما احلى غيطانا
الأصل فى أصل وطننا
حبة ليالى من الجنه
بيضت دارك يا عليوه
أما القمر أما حليوه
النحله دارت نحليوه
حطت على قلب القوطه
والدنيا رنت زغروطه
تسحرينى بمخروطه
طلى وشوفينى يا بهيه
بامد لك ع الزراعيه
حاضن رايات الحريه
أنا اللى جاى لك من بدرى
أسحرك بنغم بدرى
على الطريق فاتح صدرى
ياليله زاهيه ومبروكه
على القنال خدت فلوكه
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
بين الغيطان كنت ماشى الفجر أتنسم
الشمس رقت وشقت سن يتبسّم
هاتف هتف قال لى شوف نوارة الموسم
زهرة شقاك والصبر طول السنه
دا أعز ما فى الولد إنه ضنى
الليل يا روحى أنا ع الفجر بيسلم
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق
