المسحراتي19| أشعار فؤاد حداد.. قلب واحد

كتب – فؤاد حداد

تصوير – سمر شومان

المسحراتي19
19- قلب واحد
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مسـحـراتى فى ليالى خير
مـنـقراتى على خط سير
بقلب واحد فقط لاغير
آه يا حبايبى
الكل جنبى
من يوم ما باحبى
وانا المتيم
بحر المراكبى
خلانى أحلم
آخد فى دربى
كل الموالد
وحياتى والد
على قلب واحد فقط لا غير
شهيد وفجرى
يحيى الضحيه
ياسين وأجرى
نظره بهيه
أدور وأجرى
ومصر هيه
طيرى وشجرى
من ألف طير
لقيتنى وارد
على الموارد
بقلب واحد فقط لا غير
وان كنت شاعر
شوف البشاير
قالت عوافى
ورمت لى ورده
دليل طوافى
عطر المودّه
كل القوافى
من كلمه واحده
وقلب واحد فقط لا غير
والمشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
الحمد لله رزقنى الفجر بالمواعيد
وبدع فى قلبى وخيالى ألف وقفة عيد
وشمس تملا الليالى ولو مكانها بعيد
ما اعرفش إيه اللى كان على خدى بيندى
مشيت انا خطوه والتانيه لقيتنى سعيد
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق
المسحراتي18| أشعار فؤاد حداد.. صنايعي دِقّى
المسحراتي17| أشعار فؤاد حداد.. حي المدامع والابتسام
المسحراتي16| أشعار فؤاد حداد.. والله زمان
المسحراتي15 | أشعار فؤاد حداد.. حاج راضي
المسحراتي14| أشعار فؤاد حداد.. نفس ترياق
المسحراتي13| أشعار فؤاد حداد.. قاعد يذاكر
المسحراتي12| أشعار فؤاد حداد.. ربيع الشام
المسحراتي11| أشعار فؤاد حداد.. النوبة يا أسمر
المسحراتي10| أشعار فؤاد حداد.. صاحب حسن ونعيمة
المسحراتي9| أشعار فؤاد حداد.. وردة ما بتدبلش
المسحراتي8| أشعار فؤاد حداد.. السيد البدوي
المسحراتي7| أشعار فؤاد حداد.. صورة تعدل صورة
المسحراتي6| أشعار فؤاد حداد.. كوبري إمبابة
المسحراتي5| أشعار فؤاد حداد.. يوم العمل يوم عيد
المسحراتي 4| أشعار فؤاد حداد.. تونس الخضرا
المسحراتي3| أشعار فؤاد حداد.. تعرفني من صوتي

المسحراتي2| أشعار فؤاد حداد.. الحق واجب

المسحراتي 1| أشعار فؤاد حداد.. تاج المدينة أبوزيد هلال