المسحراتي15 | أشعار فؤاد حداد.. حاج راضي

كتب – فؤاد حداد

تصوير – سمر شومان

المسحراتي15
15- حاج راضي
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى
مـنـقـراتى
يا حاج راضى
شيخ مصطفى
نورك جايبنى
نطرح ونبنى
رمضان واهبنى
سهل ،ودفا
ندى وسماحه
سمر جماعه
يا ألف قاعه
ومضيفه
يا ميت سرادق
تحت البيادق
على نمارق
مزخرفه
والشمس مركب
مشوارها معجب
وكل مغرب
دمعه انطفا
ابسط يا صايم
هلت نسايم
وقلنا دايم
وبالشفا
وناس أحبه
زادونى لبه
كل السعاده
فى دى الزياره
وأن أراهم
مبدأ تراحم
واقول كفى
أقول كفانى
رمضان وافانى
وإيدين تفانى
وقلوب وفا
مسهله له
دار الصفا
مسا هلاله
ما ألطفه
والمشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
هات يا زمن هات تلات بلاحات وبق حليب
أبدأ فطارى على سنة رسول وحبيب
أشم ريح الحجاز أسمع تهامه ونجد
أشهد أعالى الشرف أحمل أحن الوجد
أقف بمجد العرب فى كل جمعه خطيب
اصـحى يانايم
وحّد الدايم
المسحراتي14| أشعار فؤاد حداد.. نفس ترياق
المسحراتي13| أشعار فؤاد حداد.. قاعد يذاكر
المسحراتي12| أشعار فؤاد حداد.. ربيع الشام
المسحراتي11| أشعار فؤاد حداد.. النوبة يا أسمر
المسحراتي10| أشعار فؤاد حداد.. صاحب حسن ونعيمة
المسحراتي9| أشعار فؤاد حداد.. وردة ما بتدبلش
المسحراتي8| أشعار فؤاد حداد.. السيد البدوي
المسحراتي7| أشعار فؤاد حداد.. صورة تعدل صورة
المسحراتي6| أشعار فؤاد حداد.. كوبري إمبابة
المسحراتي5| أشعار فؤاد حداد.. يوم العمل يوم عيد
المسحراتي 4| أشعار فؤاد حداد.. تونس الخضرا
المسحراتي3| أشعار فؤاد حداد.. تعرفني من صوتي

المسحراتي2| أشعار فؤاد حداد.. الحق واجب

المسحراتي 1| أشعار فؤاد حداد.. تاج المدينة أبوزيد هلال