المسحراتي13| أشعار فؤاد حداد.. قاعد يذاكر

كتب – فؤاد حداد

تصوير – سمر شومان

المسحراتي13
13- قاعد يذاكر
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى حيا الأمل
مـنـقـراتى عقله اكتمل
لا فى واجبه قصّر ولا همل
يا دنيا شوفى وأرّخى
ابنه كبر قال له يا أخى
ولا يصدق إنه يراه
ع الكرسى يجلس، وراه وراه
أخينا اقرا، أخينا ادرس
أخينا تابع جدول وفهرس
أخينا إنجح واتقن عمل
لاجل المرجح والمحتمل
لا تلاقى بكره ولا بكره تورث
من بابا إلا أربع جُمَل
وطبله من أعتق الطبل
‏-‏ طالب دعاك‏-‏ جاى لك دعايا
بس انت يا ابنى افتكر معايا
وحى نور أوده علاء
فى ليالى سمحه
قاعد يذاكر تحت السماء
خد الكتاب من ألف لـييه
للفجر حاضر عينى عليه
تبرد الميه فى القلل
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
يكتب ويقرا ويحفظ درسه ويتابع
والحى فى المغربيه بالفانوس طالع
والرجل بترد للدكان وللشارع
وست ابوها أبوها جاب لها كردان
يشبه فى بعض الليالى شمعدان والع
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق
المسحراتي12| أشعار فؤاد حداد.. ربيع الشام
المسحراتي11| أشعار فؤاد حداد.. النوبة يا أسمر
المسحراتي10| أشعار فؤاد حداد.. صاحب حسن ونعيمة
المسحراتي9| أشعار فؤاد حداد.. وردة ما بتدبلش
المسحراتي8| أشعار فؤاد حداد.. السيد البدوي
المسحراتي7| أشعار فؤاد حداد.. صورة تعدل صورة
المسحراتي6| أشعار فؤاد حداد.. كوبري إمبابة
المسحراتي5| أشعار فؤاد حداد.. يوم العمل يوم عيد
المسحراتي 4| أشعار فؤاد حداد.. تونس الخضرا
المسحراتي3| أشعار فؤاد حداد.. تعرفني من صوتي

المسحراتي2| أشعار فؤاد حداد.. الحق واجب

المسحراتي 1| أشعار فؤاد حداد.. تاج المدينة أبوزيد هلال