المسحراتي10| أشعار فؤاد حداد.. صاحب حسن ونعيمة

كتب – فؤاد حداد

تصوير – سمر شومان

المسحراتي10

10- صاحب حسن ونعيمَة
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى وقلبى كان الدليل
مـنـقـراتى فى رمله زى النجيل
والحى سامر والنجوم قناديل
جيت لك يا شيخ الفن يا مصطفى
يا مرسى يا صاحب حسن ونعيمه
والقلب الابيض فى الليالى الرحيمه
فى المرج لو غنيت زمان النخيل
بيهز ويسقط رطب زغاليل
والبدر من خمسين سنه وانت ناوى
موال يخلد الادهم الشرقاوى
زى الليله دى كان حنانه جميل
أربعة الاف قرية علينا تميل
يا صاحب الآه التى من حنانها
ع الأمهات تنده تفجر لبنها
ع العطشانين تنده تفجر سبيل
على حسك البلدى المندى الأصيل
حسن المغنى مغنى فن وليالى
والنور يصهلل والبنات فى العلالى
فتّحوا الشبابيك
واحنا فى ضيك وانت بتلالى
هزيت هلالى سبقنى ع القليوبيه
أتهنى بالأفراح ويتهنوا بيه
تحت البيارق زينه والمناديل
إحنا المراكبيه فى بحر النيل
حاملين شراع فنك لآخر جيل
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
الليل دا ناى بين القلوب مرسال
بيعلم الطبله نغم سلسال
الليل دا بيحمل فى أحضانى
فوق الشجر الاخضر شجر تانى
يا مصطفى يا مرسى رسانى
وسرح بيه
رش الماورد على المراكبيه
وفاض من الحاضر على الغايب
ومن الحبايب فاض على العذال
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق
المسحراتي9| أشعار فؤاد حداد.. وردة ما بتدبلش
المسحراتي8| أشعار فؤاد حداد.. السيد البدوي
المسحراتي7| أشعار فؤاد حداد.. صورة تعدل صورة
المسحراتي6| أشعار فؤاد حداد.. كوبري إمبابة
المسحراتي5| أشعار فؤاد حداد.. يوم العمل يوم عيد
المسحراتي 4| أشعار فؤاد حداد.. تونس الخضرا
المسحراتي3| أشعار فؤاد حداد.. تعرفني من صوتي

المسحراتي2| أشعار فؤاد حداد.. الحق واجب

المسحراتي 1| أشعار فؤاد حداد.. تاج المدينة أبوزيد هلال