المسحراتي – فؤاد حداد (7)

كتبت القصائد من صاحب ندا إلى مع السلامة في رمضان 1388
نوفمبر 1968
حزمة وحزام
ِ
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى
على طريقه
مـنـقـراتى
ورا الحقيقه
ستين دقيقه
فى كل ساعه
ماهيش براعه
لو فنى دام
فى كل كلمه
من الكلام
حضنت حزمه
شديت حزام
يطرح زمانى
بلح سمانى
من الأمانى
عالى علىَّ
ياليل يا عين
أصبر شويه
شويتين
وافضل أجاهد
بقلب جامد
فلا أضام
فى كل كلمه
من الكلام
حضنت حزمه
شديت حزام
وأنا المغنى
ولاجل انّى
يدوم شبابى
أعمل حسابى
ينقص منابى
من السنابل
لكن مناب الـ
أمل تمام
فى كل كلمه
من الكلام
حضنت حزمه
شديت حزام
ومشيت بهمه
إلى الأمام
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
من اليمن لليمامه ياما قلبى هام
وبوجد من نجد لديار النجف والشام
وفى مصر أطيب مقام السيده وامام
وفى تونس الخضرا بتنور من الأكمام
وفى المغارب مضارب للعرب وخيام
كأنى من سالف الأيام إلى زمنى
ورثت كل الهوى والعشق لازمنى
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق
المسحراتي – فؤاد حداد (6)
 

مشاركة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
باب مصر