في سيوة.. جمال الطبيعة "يكسب"

سيوة محمية طبيعية، تجد فيها جمال الطبيعة بالمعنى الحرفي للكلمة، المباني هناك أغلبها طينية، والمكان بتغطيه مزارع النخل والزيتون، دا غير عيون المية المالحة والكبريتية، وكمان بحيرات الملح الأبيض اللي شبه الجليد، حاجة كدا ولا في الخيال.
بالإضافة لكل دا، سيوة مليانة مزارات أثرية وتاريخية وسياحية، والأهم الطبيعة الخلابة اللي موجودة في كل مكان.

واحة سيوة.. الطبيعة تغلب

واحة “سيوة ” تبعد عن مرسى مطروح بحوالي 300 كم جنوبًا، وبينها وبين القاهرة حوالى 800 كم، وبينها وبين الإسكندرية حوالى 590 كم.
سيوة فيها أكثر من 35 ألف نسمة أغلبهم سيويين من أصول امزيغية وأقلية من القبائل العربية، عشان كدا هاتلاقي اللغة الامازيغية هي اللغة المحلية، بجانب اللغة العربية.

الأفضل انت تروح سيوة عن طريق شركات السياحة، اللي بتنظم رحلات يومية لسيوة  من القاهرة والإسكندرية ومطروح، ودي اسعار ومواعيد الاتوبيسات الى سيوة يوميا

أسعار ومواعيد الاتوبيسات إلى سيوة يوميا
الرحلـــــــــة موعد الانطلاق سعر التذكرة
القاهـــــرة               سيوة 8 مساء 145 جنيه
الاسكندرية          سيوة 8:30 صباحا 85 جنيه
10 مساء 85 جنيه
مطــــروح            سيوة 1:30 ظهرا 40 جنيه
4 عصرا 40 جنيه

أسعار ومواعيد الاتوبيسات من سيوة يوميا

الرحلـــــــــة موعد الاتطلاق سعر التذكرة
سيوة            القاهرة 8 مساء 145 جنيه
سيوة                الاسكندرية 10 صباحا 85 جنيه
10 مساء 85 جنيه
سيوة            مطروح 7 صباحا 40 جنيه
10 صباحا 40 جنيه

المواصلات الداخلية

ولان سيوة واحة ومحمية فيها جمال الطبيعية فأغلب شوارعها رملية وعلى جوانبها نخل كتير وأعشاب، وعشان تتنقل فيها قدامك الحلول دي
1-   التروسيكل: ممكن تتفق معاه على المشاوير الطويلة.. لكن تعريفة المواصلة غالبا بتكون 10 جنيه للمناطق القريبة.
2- الكرتة سياحي: ودي عربية خشب بدون سقف بيجرها “حمار”.. ودي متعتها فى الفسحة بمزاج وتعريفتها اغلى شوية يعنى 50 جنية وطبعا السواق سيوي، يعني عارف مداخل ومخارج المكان كويس.
3- البسكلته: ممكن تعتمد على نفسك لو رياضى وبتحب المغامرة والاستكشاف وتأجر عجلة عادية من عند “يوسف باغي” أو “أولاد عسه” والساعة بـ 10 جنيه.

الطبية في سيوة؟

الفنادق والمنتجعات والمخيمات السياحية بمختلف مستوياتها وأسعارها متوفرة في سيوة، ودي ميزة تخليك تختار اللى يناسبك ويناسب ميزانية رحلتك.
ورغم ان سيوة مش ضمن المدن السياحية الغالية عموما.. إلا أن فيها فندق “ادارا املال” واحد من أغلى فنادق العالم، سعر الغرفة في الليلة الواحدة يصل إلى 450 جنيه استرليني.. وهو فندق على الطراز المعماري السيوي التقليدي، ويدعم السياحة البيئية الصحية وبيبعد عن الواحة بحوالى 16كم.
طيب خلينا نرشحلك مجموعة فنادق ومنتجعات أسعارها مناسبة ومريحة مصممة بمزيج بين الحداثة مع الحفاظ على التراث السيوي و الطبيعة.. هانرشحلك فندق “سيوة شالى ريزرت”، وإيجار الغرفة يصل لـ550 جنيه.. وعندك “سيوة سفارى براديز” و”دريم لودج”  متوسط حجز الغرفة 880 في الليلة الواحدة.

هاتاكل ايه في سيوة

فى حاجات ما ينفعش تزور سيوة وماتجربهاش، منها أشهر الأكلات السيوية “أبومردم”، ودا عبارة عن لحم طيور أو ضأن مطبوخ داخل برميل حديد، ومدفون في قلب الرمال الناعمة بالأرض، بعد وضع كميات من الأخشاب والحطب المشتعل داخله، ويترك اللحم المتبل بالأعشاب والتوابل ليستوي على حرارة الجمر، وبعد نصف ساعة ترفع الرمال من أعلى غطاء البرميل وتخرج اللحوم اللذيذة للاكل، والوجبة دي بتكون متوفرة في المطاعم بالطلب داخل الفنادق.
أما اشهر المشروبات وأكثرها انتشارا هو “الشاى الزردة باللويزة” المطبوخ على نيران الحطب، ومضاف إليه نبتة خضراء معروفة باسم “حشيش الليمون أواللويزة”، واللي بتضيف على طعم الشاي المغلى نكهة ورائحة طيبة، وتقدم فى برّاد “إبريق” صغير الحجم مع فنجان صغير، بالإضافة إلى النعناع والكركدية السيوي ومتنساش مشروب “اللجبي” أو عصير لبن النخيل.

أشهر المطاعم والكافتيريات

اغلب مطاعم المأكولات موجودة بوسط سيوة فى ميدان السوق، وبتقدم المأكولات العادية إلى جانب الأطباق السيوية والبدوية التقليدية، وأشهرهم في وسط البلد مطعم “عبده” و”نيوستار” و”ايست ويست” و”كنوز”، أما لو عايز أكل بدوي مخصوص يبقى مطعم “نور الواحة”.
كمان ننصحك تزور كافيتريا أناماريا، ودي بتقدم بيتزا وفطائر وحلويات وجاتوه بنكهة برازيلية، حاجة لذيذة ومختلفة.
ميدان السوق
من الحاجات اللي لازم تمر عليها في سيوة ميدان السوق، ودا نقدر نقول انه مركز المدينة، وهو عبارة عن ميدان كبير وفي وسطه جزيرة واسعة يتفرع منه 6 شوارع، بتوصلك لجميع أنحاء الواحة.
وفي الميدان هاتلاقي محلات بتبيع منتجات من تراث سيوة، منسوجات ومشغولات وأزياء، كمان هاتلاقي محلات بتبيع منتجات مصنوعة من الملح، دا بالإضافة لباقي منتجات البدو زي التمور وزيت الزيتون والمخللات والكركديه.

ميدان السوق

في ميدان السوق برضه هاتلاقي أكبر جامع بسيوة وأشهرهم وهو “جامع الملك”، اللي بيسموه أهل سيوة “سيدى سليمان”.
وبالقرب من نفس المكان هاتلاقي أشهر معالم سيوة الأثرية، ومنها:
مدينة “شالي أغادي”
مكانها في وسط المدينة، وهي عبارة عن أطلال مدينة سيوة القديمة، اتبنت فى القرن الـ12  وجميع مبانيها من مادة “الكرشيف” وهو خليط محلي من الملح والرمال الناعمة والطين، وهي مفتوحة للزائرين بدون تذاكر.

المسجد العتيق

واحد من أقدم مساجد الصحراء الغربية عمره 800 عام، مبني على الطراز الأندلسي، بأيدي سكان سيوة المحليين.
جبل الموتى
يقع على بعد 1 كم من ميدان السوق، يضم مجموعة من المقابر على شكل حجرات محفورة فى قلب الجبل، كانت مخصصة للدفن في العصرين الروماني واليوناني، وفيها 4 مقابر شهيرة أهمهم مقبرة “سي آمون” الملونة.
مواعيد الزيارة من 9 الى 5 مساء يوميا، وسعر التذكرة 10 جنيه للفرد و5 جنيه للطلاب.

جبل الدكرور

يقع على بعد 3 كم جنوب سيوة.. وهو عبارة عن سلسلة تلال منظرها خلاب.. كما أنها مشهورة بإن رملتها تستخد في حمامات العلاج من الروماتيزم وآلام المفاصل والعمود الفقري والأمراض الجلدية.

أيضا في الواحة معبد الاسكندر.. ويقع على بعد 3 كم شرق سيوة فى منطقة أغورمي.. بيسموه برضه معبد الوحي أو التنبؤات.. بناه كهنة آمون فى الأسرة 26 ، واتشهر بزيارة الاإسكندر الأكبرعام 331 قبل الميلاد.. وهناك سأل الكهنة هن مستقبلة فتنبؤوا أنه هيحكم العالم، عشان كدا سموه معبد التنبؤات.
ومواعيد الزيارة من 9 إلى 5 مساء، وسعر التذكرة 10 جنيه للفرد و5 جنيه للطلاب.

معبد “آمون”

كما يوجد معبد آمون، وأهل سيوة بيسموه “أم عبيدة”.. بينه وبين معبد الإسكندر 800 متر.. واتبنى في  عصر الأسرة 30.

علاوة على كل دا، في سيوة هاتلاقي أكتر من 200 عين مياه.. ما بين مالحة وعذبة وكبريتية، وفيه منها بيستخدم في العلاج.

كما يوجد عين”جوبا” كليوباترا، واسمها كمان “عين الشمس” وتعتبر من أشهر المزارات السياحية.. وهي عبارة عن مغطس من الأحجار ممتلىء بالمياه الطبيعية الدافئة.

عين فطناس

كذلك عين فطناس.. متقلش شهرة عن عين “جوبا” كليوباترا، بينها وبين ميدان السوق 4 كم.. وهي عين للمية العذبة.. وعندها ممكن تستنى لوقت غروب الشمس وتاخد أروع صور لقرص الشمس وقت الغروب.

كما يوجد عين “تترا”، وهي عين مياه كبريتية علاجية، بتستخدم في علاج الأمراض الجلدية زي الصدفية والروماتيزم، وتبعد 2 كم بحري من منطقة السوق.

البحيرات

بيسموها السيويين “البركة”، وهي مجموعة من البحيرات المالحة، تنتج ملح أبيض شبه التلج.. وبيستخدم في منتجات كتير.
نيجي بقى لارحلات لسفاري.
في النهاية لو فاتك تطلع سفاري فى سيوة يبقى ضيعت جزء كبير من الرحلة.. عشان كدا لازم تنسق مع الفندق المقيم فيه، عشان تشوف الجملا الخلاب للطبيعة في سيوة.

السفاري وسط الطبيعة الخلابة

وخلال رحلة السفاري هاتزور عين” بير واحد”، واللي بيسموها عين “بحر الرمال الأعظم”.. وتبعد 10 كم من سيوة، وفيها مياه كبريتية ساخنة طول السنة حتى فى عز الشتاء، وهناك فى أوضة لتغيير الملابس لو حبيت تستحمى فى عين بير واحد.
وعلى بعد 2 كم منها هاتزور “البحيرة الباردة”، ودا لأن ميتها باردة طول السنة صيف أو شتاء، وممكن تستحمى فيها برضه.
وعشان تعرف معلومات أكتر عن تاريخ سيوة وتراثها ننصحك تزور مركز سيوة لتوثيق التراث ، ودا موجود بحديقة مجلس مدينة سيوة خلف المسجد الكبير وهو نموذج للبيت السيوي القديم من الطين المحلي “الكرشيف”، والمركز توثيق لكافة جوانب التراث السيوي من عادات وتقاليد وفنون وصناعة وحرف وموسيقى وشعر، وكل اللي انت عايز تعرفه عن سيوة.
مواعيد العمل من الساعه 8 صباحا حتى 2 ظهرا، والتذكرة للفرد 2 جنيه.

متحف بيت السيوي

كذلك من الحاجات اللي لازم تزورها في سيوة متحف البيت السيوي.. ومكانه جنب مركز توثيق التراث، وهو مبني على طراز البيت السيوي التقليدي، وفيه مقتنيات بتعبر عن التراث والثقافة السيوية زي الأزياء وأدوات الزينة والمشغولات وأدوات الزراعة والأدوات المنزلية.
ومواعيد العمل من الساعه 8 صباحا حتى 2 ظهر، والتذكرة 5 جنيه للفرد.

مشاركة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
باب مصر