ادب وفننصوص أدبية

"ست الحسن" قصيدة للشاعر محمد أبو العبادي

ما بقيتش أدوق
طعم البراءه ف لعبهم
ولا ضحكهم
ولا عادش حاجه تلمُّهم
غير العذاب
صوت الضمير م الخلق غاب
خلا الولاد ع الأرصفه
بيلمّوا زادهم م التراب
الليل كئيب من غير نجوم
والصبح متغطّي بضباب
أصعب مافيكي يا مصرنا
لمّا الملايكه تبات بجوع
والفرح بيموت اكتئاب
يا جنّه كنتي بألف باب
إتسدّوا ليه كل الببان ؟
ليه الضنا ف بحر الهموم
والخير ف إيد الألعوبان ؟
يا رافعه إيدك للسما
يا زارعه قلبك بالإيمان
صوت الجرس أصبح أنين
والدمع ف عيون الأدان
كنتي ف زمان قبل الزمان
سلّة غلال المحرومين
كنتي الشجر
كنتي النخيل
والنيل بعطر الطيبين
كان العنب طعم العسل
كان البصل رمان وتين
دلوقتي ليه متمددة
ف السيدة وسيدنا الحسين ؟
متعفّره بحبّة تراب
 
والتوب مقطّع ع البدن
مين اللي باعك بالرخيص
واختار مكان غيرك وطن ؟
مين عرّى بدنك جوّعك ؟
مين لف بدنك بالكفن ؟
يا صابرة من زمن الزمن
مهما الزمن داسك عذاب
واللا اتعجنتي بالمحن
رح تفضلي
ف عيوني ست الحُسن مصر
وأنا مهما بيّا العمر مر
رح اكونلك الشاطر حسن

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى