خمسة سياحة| قنا.. هنا بلد «نسر الصعيد»

أحلى بلد صعيدي، جدعنة وطيبة مالهاش آخر، بس خد بالك من شمسها في الصيف، بتبقى حر، لكن بالليل بيبقى الجو حلو، وفيه نسمة هوا حلوة هاتشمها من وقت للتاني.
قنا بينها وبين القاهرة 600 كيلو متر، يعني تقريبا مسافة 8 ساعات بالقطر، لو هاتيجي طيران يبقى هاتنزل في مطار الأقصر، بينه وبين قنا ساعة بالكتير، أما لو هاتيجي بالباص يبقى هتنزل جنب المحطة أو قدام جامع سيدي عبد الرحيم القنائي، ومن هناك تقدر تاخد أي تاكسي لأي مكان، وتعريفته 10 جنيه.

مواعيد القطارات من القاهرة إلى قنا

قطارات Vip
– من الساعة 9 مساءً إلى 6 صباحًا.
– من الساعة ال11 مساءً إلى 8 صباحًا.
القطارات المكيفة
– من الساعة ال12 ظهرًا إلى 11 مساءً.
– من الساعة ال12 منتصف الليل إلى 9 صباحًا.
– من الساعة ال1 صباحًا إلى 10 صباحًا.

هاتبات فين؟

فنادق قنا مش كتير، بس بنرشحلك فندق بسمة، ودا مكانه جنب نادي القضاة، سعر الغرفة للفرد 250 جنيه، والشاليه 400 جنيه
وعندك كمان فندق جراندو في شارع الجمهورية، سعر الغرفة للفرد 150 جنيه لليلة الواحدة.
من الحاجات اللي بننصحك تزورها في قنا الأسواق، أيوة الأسواق، لازم تاخد جولة فيها:
سوق السهاريج بقنا، هو أقدم و أطول سوق ممكن تمشي فيه، وهو كمان طريق مختصر تمشي  فيه، يبدأ أوله عند مسجد السيد عبد الرحيم، من بعد مزلقان السكة الحديدية.
ولو عايز سمك، يبقى تاخد الطريق الجانبي المتفرع من السوق، وينتهي على الشارع

قنا ليلا- تصوير: حسن الحامدي

الرئيسي وهو “شارع الجميل”، ولو كملت في طريق السوق هاتلاقي نفسك في ساحة واسعة فيها محلات ملابس وسجاد، وجنب دا كله مقام الشيخ أحمد المغازي، والساحة دي بميدان الأنصاري، والمكان دا كله له طابع معماري مميز، لازم تاخد كام صورة عشان المكان دا هايوحشك.
لو كملت في طريقك هايقابلك مسجد أبو سلمى، وهو من المساجد القديمة برضه، بعدها هاتدخل في منطقة محلات الدهب، وبعدها ميدان الساعة وكدا تبقى انت وصلت وسط البلد يا معلم، تقدر تروح اي حتة في قنا.
لو لسة فيك نفس، يبقى كمل من ميدان الساعة على السوق الفوقاني، أو سوق الحميدات، هايقابلك طريق جانبي عبارة عن منخفضات ومرتفعات، وتقريبا عشان كدا سموه الفوقاني، الطريق دا عبارة عن سوق، أكتر حاجة بتميزه ريحة العيش الشامي اللذيذة.

هاتزور إيه ف قنا؟

نبدأ معاك من المدينة، أهم مكان تزوره هو جامع سيدي عبدالرحيم القناوي، وهو أول حاجة هاتقابلك لما تنزل قنا، طبعا هو أشهر مساجد قنا، والصعيد كمان، أنشئ في العصر الأيوبي، الجامع تحفة معمارية، في كل يوم أربعاء، بيعملوا حاجة لطيفة اسمها فايدة الأربعاء، ودي عبارة عن دعاء بيتقال هناك بقصد إجابة الدعاء، جرب تعملها.
وانت في وسط البلد زور الكنيسة المرقسية، وجنب منها كنيسة مارجرجس أقدم كنيسة بقنا، ومكانها في منطقة الشنهورية جنب مدرسة الراهبات، ومعاهم أكبر دير في قنا هو دير مارجرجس بقرية المحروسة، ومكانه غرب قنا بحوالي 25 دقيقة.
من الحاجات العظيمة اللي لازم تزورها في قنا معبد دندرة، وهو أشهر المعابد المحفوظة في مصر، يقع على بعد حوالي 5 كم شمال غرب مدينة قنا.
مدينة دندرة عرفت في النصوص المصرية باسم “تانترت”، أي “الإلهة” إشارة إلى الإلهة حتحور، ثم أصبحت في اليونانية “تنتيرس”، وفي العربية “دندرة”. كانت عاصمة الإقليم السادس من أقاليم مصر العليا، وعبد فيها الثالوث (حاتحور، وحور بحدتي، وحور إحي، والمعبد يرجع إلى عهد الأسرة الرابعة.
جنوب المعبد فيه جبانة قديمة تضم مقابر محفورة في الصخر، بعضها لحكام المقاطعة، اللي كانوا مرتبطين بخدمة الإلهة حتحور.
كمان عندك كورنيش قنا من الأماكن اللي ممكن تقضي عليها وقت لطيف، ممكن تاخد أي سيرفيس من أي مكان يزلك الكورنيش، أو طفطف بجنيه، ولما توصل هناك جرب تاخد مركب بجنيه، هاتستمتع.
من عند الكورنيش خد توصيلة لمتحف السيرة الهلالية، اللي يضم مجموعة كبيرة من مقتنيات الراحل عبدالرحمن الأبنودي، والدخول مجاني، ولو روحت يوم الإثنين يبقى استنى الأمسية الشعرية، واستمتع بشعر الواو وقصايد من شعراء البلد الطيبة.

مينفعش تكون في قنا وما تزورش قوص

وانت في قنا جرب تروح جزيرة الروبي في مدينة قوص، يعني بينها وبين قنا تقريبا نص ساعة، ودي تروحلها بعربية أجرة لقوص والأجرة  4.5 جنيه، هتنزل قدام مرسى المراكب، وتاخد فلوكة للجزيرة بـ20 جنيه، وتقدر تقضي يومك هناك لحد الساعة 5 مساء.
مواصلتك من قوص لأي قرية بتبقى بـ2 جنيه، وعشان وصلت قوص يبقى لازم تقضي كام يوم فيها، قوص على الجانب الشرقي للنيل، لما تنزل قوص طري على قلبك بعصير قصب أو تمر هندي عشان لسة معاك جولة طويلة.
ناس قوص طيبين، والشوارع هناك قديمة فيها ريحة زمان، من أشهرهم شارع القيسارية وشارع الشيخ يوسف، أقدم وأشهر الشوارع بقوص، وشارع الشيخ الطواب، وشارع الحاكم بأمر الله واللي فيه مسجد الحاكم القديم ويحتوي على نسخة قديمة من القرآن من أيام الحقبة الإسلامية، والمنطقة كلها تتميز بمبانيها وأبوابها القديمة، دا بالإضافة للمعبد البطلمي ومنطقة الآثار الإسلامية والكنيسة الانجيلية الحديثة، وغيرها من الشوارع القديمة.
وانت في قوص اتمشى في شارع المعصرة، هاتشم ريحة القهوة والبن المحوج طول مانت ماشي، ومن الشارع عدي على المعصرة القديمة، اللي لسة بتشتغل بأدوات بدائية، ومن هناك عدي على شارع درب الكُتَّاب، ودا من الشوارع القديمة في طريق المسجد العمري، اتسمى كدا عشان كثرة الكتاتيب اللي كانت فيه.

دشنا بلد المشايخ

لسة في قنا بلد الجدعان، لكن سكتنا النهاردا هاتكون إلى دشنا، اللي تقع بين قنا وبين نجع حمادي.
دشنا كلمة قبطية معناها المبقلة يعني محلة زراعة البقول، وفيه مؤرخين بيقولوا إن الاسم يرجع لعصر الحملة الفرنسية عشان كانت مركز تدشين سفن الحملة، لكن عموما هي بلد تاريخها كبير ومشهورة بالزراعة.
جو دشنا حر في الصيف، وبيكون برد في الشتا، لكن الشيء اللي بيلطف الجو هو انتشار الزراعة والمساحات الخضرا.
شوراع دشنا هادية، إلا شارع المركز وشارع المحطة، عشان  الشارعين مكان تجمع المحلات وبائعي الخضار واللحوم والأسماك.
ميدان المحطة
لو قررت تقيم في دشنا، أول ما تنزل المحطة هاتلاقي في وشك لوكاندة المحطة، ودي فندق شعبي، تحت منه قهوة أولاد جعفر، ودي من أقدم قهاوي دشنا، وشغالة 24 ساعة، وقصادها محل فول وطعمية، وقدام شوية قهوة موافي وفيها ممكن تاكل احلى طبق فول بالسمن البلدي.
بل ريقك، بكوباية قصب عند محل عصير  الفيل، من أقدم محلات القصب في دشنا، مكانه قدام مركز الشرطة في شارع المركز، وقدام شوية فيه محل عصير أولاد نصر بجوار شركة المبتكرات وبرده امام مكتب البريد في شارع المحطة محل عصير الحبايب.

كيف الحال إذا أخبرتك أن هذا الشارع هو الأكثر زحاما في دشنا؟ تصوير: أحمد طه


دشنا مشهورة إنها بلد المشايخ، عشام كثرة مقامات الأوليا فيها، ومن الحاجات اللي لازم تزورها منطقة “الشق الفوقاني”، ودي من أقدم المناطق في مدينة دشنا، وهي عبارة عن مكان مرتفع، في مواجهة النيل، موجود فيه أغلب الأضرحة والمقامات الشهيرة ومنها ضريح وساحة الشيخ جلال الدين الكندي، اللي بيقام فيه الاحتفال بالمولد النبوي وبيحييه ياسين التهامي، وفي نفس المنطقة، هاتلاقي تجمع أصحاب المهن القديمة، زي النحاسين والمنجدين وتجار الخردة، وكمان هاتلاحظ البيوت هناك بطرازها المعماري القديم، مشربيات وأرابيسك، وكمان فيها أقدم مسجد في دشنا مسجد رشوان.
جنب النيل هاتلاقي معديات ورا ضريح الشيخ جلال، ودي هتوديك على مركز الوقف اللي كان تابع لدشنا إداريا وانفصل عنها أواخر التسعينات، أي حاجة ليها علاقة بالأكل حتلاقيها في شارع المركز، وده فيه سوق الحريم، اللي فيه جميع أنواع الملابس والمفروشات.
هاتلاقي في نفس الشارع برضه سيما أمل، دار العرض الوحيدة في دشنا اللي أنشئت في الستينيات.
من الحاجات الأساسية اللي لازم تجربها وانت في دشنا، هي العيش الشمسي، وهاتلاقي منه قراقيش.


عسل نجع حمادي

بعد جولتك في دشنا، هاتتحرك شمالًا إلى نجع حمادي، ودي أكبر مدينة في قنا، وليها تاريخ طويل باعتبارها مدينة تجارية وصناعية قديمة.
من الحاجات المميزة اللي لازم تجرب في نجع حمادي “الحنطور”، ممكن تأجره حسب الاتفاق وأجرته بتبدأ من 25.
من أكتر الحاجات المرتبطة بنجع حمادي، العسل الأسود والجلاب، ودا عشان مصنع السكر اللي في نجع حمادي.

النيل في نجع حمادي- تصوير: بسمة الخطيب


من أجمل المناطق اللي تزورها في نجع حمادي، هي “القناطر”، وتبعد حوالى 14 كم عن المدينة، ودي تعتبر مكان مفتوح للنزهة، وهناك فيه أحلى مطاعم سمك طازة.
لو تعبت من المشي ممكن ترتاح شوية في النادي الاجتماعي، وميزته إنه مطل على النيل مباشرة وفيه جلسات خاصه بالعائلات والشباب والأطفال وقاعة مفتوحة للمناسبات  .
من الأماكن الأثرية اللي لازم تزورها في نجع حمادي قصر البرنس ومجموعته المعمارية، ويتكون من السلملك والحرمليك والسبيل، والمجموعة المعمارية فيها حديقة تحتوي على أشجار نادرة ومتنوعة ومكانها على النيل مباشرة  .
ومن المزارات برضه دير” الأنبا بضابا” وعندك “جامع شيخ العرب همام ” بفرشوط، ودا تروحله بمواصلة من نجع حمادي إلى فرشوط بـ2.5 جنيه.

مشاركة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
باب مصر