المسحراتي8| أشعار فؤاد حداد.. السيد البدوي

كتب – فؤاد حداد
تصوير – سمر شومان
المسحراتي
8- السيد البدوي
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى والحوارى ميدان
مـنـقـراتى والنجوم شمعدان
أم العواصم طنطا يا سيدى
جيت لك على ريح الماورد الندى
والناس فى قلبى والبساط أحمدى
اللى افتدى الأوطان
واللى زرعها غيطان
أزهى الشجر والعيدان
آه يا أعز الطلب
بدروا غناى حنان
جعلوا شقاى طرب
حب العزيز مهرجان
ورمل سينا دهب
والنصر فى رمضان
فرح الكفور والعزب
بيض الليالى الحسان
هزت هلالى العجب
أنا شفت نور الإيمان
على الجبين انكتب
والنور يلف الزمان
والنور زمانه وجب
والنور سطع على الأدان
والنور لطنطا اتوهب
شمس وقمر يسجدان
على علالى العتب
شى لله يا شيخ العرب
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
شى لله يا شيخ العرب دقيت على الأبواب
وكل سائل بإذن الله يلاقى جواب
وكل صايم يقوم الليل يلاقى ثواب
رمضان فى طنطا ألاقى المغربيه شروق
والاقى فى ليلى على جبين القمر مفروق
ما احلى الغرام القديم فى القلب لما يروق
سبح بحمد العليم واستغفر التواب
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق
المسحراتي7| أشعار فؤاد حداد.. صورة تعدل صورة
المسحراتي6| أشعار فؤاد حداد.. كوبري إمبابة
المسحراتي5| أشعار فؤاد حداد.. يوم العمل يوم عيد
المسحراتي 4| أشعار فؤاد حداد.. تونس الخضرا
المسحراتي3| أشعار فؤاد حداد.. تعرفني من صوتي

المسحراتي2| أشعار فؤاد حداد.. الحق واجب

المسحراتي 1| أشعار فؤاد حداد.. تاج المدينة أبوزيد هلال