المسحراتي34| أشعار فؤاد حداد.. الحمدلله

كتب – فؤاد حداد
تصوير – سمر شومان
الحمد لله
اصحى يا نايم

وحّد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحّد الرزاق

رمضان كريم



مســحـراتى مـنـقـراتى فى طريق
الحاره بعد الحاره بعد الميدان
يا سامر الحنيه فى رمضان
قلبى وعينى فى الطرب والبريق
باغنى واستفتح وكان يا ما كان
وقبل ليل ونهار وشمس وقمر
نور السلام والرحمه فوق البشر
يا قوة الإنسان ويا ضعفه
              يا قسوته وعطفه
بينى وبينك يا زمن حواديت
فكرنى أول خطوتى لو نسيت
أول قصيده قلتها وقالت
أول دموع من مقلتى سالت
أول دعائى للعليم السميع
أول فرح فى قلبى لما طرح
قمره بتفرش لى بساط الربيع
شجره وظلتها تساع الجميع
يا سامر الحنيه يا سامر
دا مهما كان فى القلب حته بتوجع
الدنيا ناس بتروح وتيجى وترجع
بسلامة الله

مع السلامه أحلى كلمه تودع
الحمد لله

على السلامة أحلى كلمه تلاقى
الله وعدنا بالنعيم الباقى
المشى طاب لى



          والدق على طبلى

ناس كانوا قبلى

           قالوا فى الأمثال:

“الرجل تدب مطرح ماتحب”



* * *

وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى

                       حته من كبدى

                                حته من موال:


نزل الندى ع التراب والورد ما أحلاه
شاف الربيع غصن أخضر زهّره وعلاه
من ألف مادنه شعاع قلبى حمد مولاه
من كل ليله ذكرت وكل فجر صلاه
فى كل خطوه سبقنى صوت يقول‏:‏ الله


اصـحى يانايم


وحّد الدايم




السعىُ للصوم


خيرٌ من النوم




دى ليالى سمحه


نجومها سبحه




اصـحى يانايم


يانايم اصحى


 وحّد الرزاق

مشاركة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
باب مصر