أمثال وأشعار

المسحراتي – فؤاد حداد (9)

كتبت القصائد من صاحب ندا إلى مع السلامة في رمضان 1388
نوفمبر 1968
دواليب زمان
ِ
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى
مـنـقـراتى
منجراتى
دواليب زمان
ما تشتكوشى
دقة شاكوشى
جت فى الأوان
يا ناس حبايب
يا ناس جيران
أنا قلبى دايب
على البيبان
عجوز شويه
لكن عينىّ
روحين حنان
لا ظنى سيئ
ولا جبان
درويش وأوسطى
وشيخ كمان
وفى عبّى قطه
ازاى حتلعب
فيه الفيران
تسألنى باتعب
أقول صراحه
شقاىَ راحه
قوة حصان
لاجل وعشان
قبول عيالى
فى الامتحان
وأنا فى بالى
حاجات جنان
من الطبالى
أعمل صيوان
وابنى لخيالى
أربع حيطان
دا انا فى انتقالى
من أولى ساقيه
لسد عالى
لقيت مكان
سيرى يا موجه
بالتكنولوجه
لبر الأمان
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
لو ماشى فى الصحرا شفت النور أقول إنسان
دا انا كل شباك يقيد أشكر لإيد إنسان
واقول هدتنى المناير سبّحِتْ للعرش
يا رب من رحمتك مكّنت للإنسان
يغيّر الضلمه أما النور ما يتغيرش
طبله خضرا
ِ
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى
مـنـقـراتى
مشـيت بخطـوه متثبته
لاجل العجيبه
اللى مش عجيبه
شـاعر وحاسـس وشيخ فتى
ولو خفيّف
واعرف أصيّف
بالإنسانيـه فى عز الشتا
طول عمرى جد
وما اكلش حد
وما افتـحش مقله للمقلته
غنى بإيمانى
عن الأمانى
الوعد عمـرى ما اقول متى
خد تاتا تاتا
الساعه تلاته
على طبـله خضرا منبته
خد طم ططمطم
حتى المقطّم
اذا ســمـعـهـا تلفتا
أنا مش بانادى
لام الصينيه
فى البطـانيه مـتكلفتـه
أنا بانادى
مواطنى
قلوب هنيه
بالخمسميه
المشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
كل اللى كان فى البال غيّر لى ريقى و بلّ
الليل وياما طال الفجر ياما طلّ
عجوز شويه وعلى راسى خطوط بيضا
والفجر لسه صغير لسه فى البيضه
وأنا ماشى باسمع سلامات الندى والطل
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق
المسحراتي – فؤاد حداد (8)

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى