المسحراتي – فؤاد حداد (5)

كتبت القصائد من صاحب ندا إلى مع السلامة في رمضان 1388
نوفمبر 1968
سهران
ِ
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى
مـنـقـراتى
أنشـد واقول
بعد الصـلاةِ
على الرســول‏:‏
أنزل كتابه بلسان عرب
وبخيل محمد الله ضرب
من المشارق للمغترب
على جبين السما انكتب
هلال وراؤه قلبى انجذب
وراؤه أتبع سبب سبب
سلخت شعبان من رجب
وبعزم ما بى ناديت وجب
أصوم جهادا واصبر غضب
ما جف دمعى ولا نضب
يتيم أنوح على العتب
الدم أغلى من الدهب
الأرض شدت زى العصب
من الكرامه الى النقب
وكل شبر وحته من بلدى
حته من كبدى
حته من موال:
لسه العرق يا عم
ما ياخدش ثار الدم
ما يقيمش وحده الطوب
لسه الشهيد مكتوب
على جبين أجيال
علشان كدا يا خال
سهران أنا وابنى
سهران يناوبنى
لسه العرق مغلوب
مهما شقى وشغّال
ما يقيمش وحده الطوب
ولوحده ما يبنى
علشان كدا يا خال
سهران أنا وابنى
سهران يناوبنى
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق
المسحراتي – فؤاد حداد (4)

×

×

مشاركة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى