المسحراتي- فؤاد حداد (1)

كتبت القصائد من “صاحب ندا” إلى “مع السلامة” فى رمضان 1388- نوفمبر 1968
صاحب ندا
ِ
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى صاحب ندا
مـنـقـراتى كدا كدا
فى إيدى طبله مجوِّده
أمشى على ريحة الندى
والنسمه فى الجوّ مُنشده
توالى موالى والحدا
يا مصر يا واحه مسعده
نطقت والفجر كان صدى
حتى الشجر فى الحجر شدا
لما بدأت التاريخ بدا
لِحمه وطول الزمن سِدى
انتِ الاميره المجاهده
الإنسانيّه أم الفدا
أم الحضاره يا والده
ضميتِ الازهر والسيده
وألف مادنه يداً يدا
سياج لأمه موحده
يا مصر عيشى على المدى
واهدينا ثانيه مخلده
إما الشهاده أو الهدى
النصر الأكبر على العدى
يا كحل عينى يا مُنْجِده
والمشى طاب لى
والدق على طبلى
ناس كانوا قبلى
قالوا فى الأمثال:
“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
صوموا وقولوا آمنا يا عباد الله
كونوا قلوب مطمئنه يا عباد الله
النصر فينا ومنّا يا عباد الله
احنا عرب والنبى عربى وضامنّا
ما ينكسرشى يميننا يا عباد الله
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق
فؤاد حداد

مشاركة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى