المسحراتي14| أشعار فؤاد حداد.. نفس ترياق

كتب – فؤاد حداد
تصوير – سمر شومان

المسحراتي14

14- نفس ترياق
اصحى يا نايم
وحّد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحّد الرزاق
رمضان كريم
مســحـراتى ينادى فى الاحياء
مـنـقـراتى من الألف للياء
صرف القسيمه على بسيمه وعلاء
والمكوجى بيكوى هدوم العيد
والبيت دا هو مقبل على الزغاريد
والصاجه رايحه وجايه بالمواعيد
ريحة المخابز من هنا لبولاق
والسهرانين فى الحى منتشرين
حتى الساعاتى منور البتارين
وأنا دورى نمره أربعه وعشرين
فى محل الاسطى سيد الحلاق
وبامد رجلى عترت فى القصاقيص
دا ترزى بدله وجاره ترزى قميص
قفطانى الاخضر أسعد الازياء
وجناحى الاخضر لو أمرته يطير
دا أنا ألف ليلة وجلة الاساطير
يا عم يا اللى بتدرس الاشياء
والطفل دا اللى فى قلبى لسه حاويه
يرجع يغنى ع الفانوس وحويه
أبوك صغر يا اِبنى يعنى خاويه
أصل الكريم رمضان نفس ترياق
المشى طاب لى
والدق على طبلى
ناس كانوا قبلى
قالوا فى الأمثال:

“الرجل تدب مطرح ماتحب”
* * *
وانا صنعتى مســحـراتى فى البلد جوال
حبيت ودبيت كما العاشق ليالى طوال
وكل شبر وحته من بلدى
حته من كبدى
حته من موال:
أنا طلب القرب من وحوى فى إياحه
قمره على خدها زغاريد وتفاحه
قالوا لى تكبر عليك انا قلت بالراحه
دى أبوها سلطان لكين البنت فلاحه
اصـحى يانايم
وحّد الدايم
السعىُ للصوم
خيرٌ من النوم
دى ليالى سمحه
نجومها سبحه
اصـحى يانايم
يانايم اصحى
وحّد الرزاق
المسحراتي13| أشعار فؤاد حداد.. قاعد يذاكر
المسحراتي12| أشعار فؤاد حداد.. ربيع الشام
المسحراتي11| أشعار فؤاد حداد.. النوبة يا أسمر
المسحراتي10| أشعار فؤاد حداد.. صاحب حسن ونعيمة
المسحراتي9| أشعار فؤاد حداد.. وردة ما بتدبلش
المسحراتي8| أشعار فؤاد حداد.. السيد البدوي
المسحراتي7| أشعار فؤاد حداد.. صورة تعدل صورة
المسحراتي6| أشعار فؤاد حداد.. كوبري إمبابة
المسحراتي5| أشعار فؤاد حداد.. يوم العمل يوم عيد
المسحراتي 4| أشعار فؤاد حداد.. تونس الخضرا
المسحراتي3| أشعار فؤاد حداد.. تعرفني من صوتي

المسحراتي2| أشعار فؤاد حداد.. الحق واجب

المسحراتي 1| أشعار فؤاد حداد.. تاج المدينة أبوزيد هلال

مشاركة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
باب مصر